Rozerîn Gultekîn

 

WAN - Endama SESî Fatma Arslan a ke bi KHKyî ameye îxrackerdiş, va ke kedkarê weşîye mobîng û tacîzî dir ablûqa bîyî û va, cinîyê ke ameyî îxrackerdiş têkoşînê sendîkalî û rêxistinî de rolê serkêşî kay kenê.

 

Cinîyê ke xo amade kenê 1ê Gulane Roşanê Karkeran de bikewê meydanan, tena bi waştişanê xebatêk adilane û asayîş nê, eynî wextî de semedê naskerdişê keda înan û pîlkerdişê têkoşînê cuyêk têduştî zî vengê xo berz kenê.

 

Endama Sendîkaya Kedkarê Xizmetê Weşîye û Komelî (SES) Fatma Arslan, binpaykerdişanê heqî, problem û rayîrê çareserîya problemanê wareyê weşîye ser o qisey kerd.

 

Bi KHKyî rayîrê cezakerdişî

 

Fatma Aslan va ke dimayê serra 2015ine merdimî hedef ameyê girewtiş û bi KHKyan ameyî cezakerdiş û va: “Bi qerarnameyê hukmê qanûnî dir bi seyine kesî ameyî îxrackerdiş. Ez zî yew nê kesan ra ya. 2017ine de ameya îxrackerdiş. Mêrdeyê xo dir ameya îxrackerdiş. Tutê ma estbî. Cuyêk ma estbî. La ma hedef girewtî. Ma bi nanê ma terbiye kerd. Ma têkoşînê xo dewam kerd.”

 

‘Hedefgirewtiş tesaduf nîyo’

 

Fatma Aslan eşkera kerd ke wexto ke ameya îxrackerdiş hemsereka şubeya SESî ya Wanî bî û wina va: “Yê ke fehm kerdî ke nêeşkenê vernîya têkoşînê ma bigîrê ma îxrac kerdî. Hedefgirewtişê cinîyanê ke têkoşîn domnenê tesaduf nîyo. Bi armancê ke cinî hepsê keyeyî bêrê kerdiş nê kenê. O wext xeylê cinîyê ke ameyî îxrackerdiş têkoşînê rêxistinkerdeyî û sendîkalî de serkêş bîyî. La nê çî ser ma sereyê xo nêtewêna. Eksê nê, têkoşînê ma pîlêr kerd. Dima ra prosesê îxracî huqûqî de zî ma meşgul kerd. Komîsyonê OHALî ame awankerdiş. Bi serran dosyayê ma ameyî vinderyayîş. 5 serrî dima red ame. Dosyaya mi şîya şûrayê dewlete, hema zî domîyena. La bi têkoşînê xo ez do serkewî.”

 

‘Îxracî dir prosesê ekonomî’

 

Fatma Aslan dîyar kerd ke dimayê îxracî problemê ekonomî ciwîyayê, semedo ke debarê xo bikerê xebatanê cîyayan de xebitîyayê û wina va: “Ez kafe de, salonê sporî de xebitîyaya. Dima ra mi semedê xo kargerî akerd û mi 7 serrî xebata xo kerd. Mêrdeyê mi kuçe de garîs rot. Nika ma cuya xo domnenê. La demê verênan de zaf zehmet bî. Wexto ke ma ameyî îxrackerdiş ameyoxê tutan tesîr bî. Xebat çinbî. Ez teqawît bîya û zemînê sendîkalî de xebate kena. Keda cinîyan bi serran o hetê sîstemê serdestê kapîtalîstî ra yeno çinkerdiş. Keda cinîyan yena çinkerdiş.”

 

Do 1ê Gulane semedê aştîye veng bêro berzkerdiş

 

Fatma Arslan derheqê pêşwazîkerdişê 1ê Gulane de zî wina va: “Her hetê cimatî kedkar o û şekil dano cuye. Nê semedî ra 1ê Gulane hîna manayêr bena. Ma do pêro şarê xo dir bi vengêk xurt aştîye bîyarê ziwan. Ma do waştişê cuyêk azad û têduşt bîyarê ziwan. Nê hetî de ma her kesî dawet kenê meydanê 1ê Gulane.“​​​​​​​​​​​​​​​​