MERKEZÊ XEBERAN- Îran de 3 cinîyan rê ke mensubê komelê Bahayî yê, cezaya hepsî ameye dayene. Ame eşkerakerdene ke nê 3 cinîyî sewqê Zindanê Kirmanî ameyî kerdene.

 

Keyepelê bi nameyê “Vengê Hepsîyanê Kurd û Îranijan”, derheqê destbendkerdişê hîrê cinîyan de melumatî pare kerdê. 

 

Goreyê melumatanê ke ameyî parekerdene; Beşarî Mistefewî, Nahid (Îlna) Neîmî û Dîdar Ehmedî yê ke qezaya Refsencanî ya Kirmanî ra yê û mensubê komelê Bahayî yê, seba îfadegirewtişî venga înan ameyo dayene û dima zî sewqê Zindanê Kirmanî ameyî kerdene. Dîyar bîyo ke her yewî rê 4 aşmî cezaya hepsî ameya dayene.

 

Xebere de ameyo vatene ke; verê cû hetê Şubeya 3. ya Mehkemeya Şorişî ya Refsencanî ra bi manayê “delîlê besî çîn ê” ameybî beraatkerdene. Labelê bi îtirazê serdozgerîye reyna ameyî muhakemekerdene û cezaya hepsî seba înan ameya dayene.

 

Sewbîna ameyo vatiş ke yew nê cinîyan ra digane ya.