AMED - Konferansê Cinîyanê Îdarekardişanê Herêmî ya Amedî de cinîyan wina vatî: “Ma do pêra rêxistinê komunal awan bikerê û awankerdişê paradîgmayî de rolêk serkêşî kay bikerê.”

 

Konferansa Cinîyanê Îdarekardişanê Herêmî ya Amedî bi sloganê “Ma bi îradeyê cinîyan û komunan, bi îdarekardişanê herêmî cimatêk azad awan kenê” Eywana Alî Emîrî ya Bajarê Pîlî ya Amedî de ame organîzekerdiş. Zaf hemşaredar û endamê meclîsan bi cilê neteweyî tewrê ci bîyî. Dimayê deqeyêk rêzgirewtişî, endama Komîteya Merkezî ya Îdarekarîya Herêmî ya DEM Partî Gulîstan Atasoy qisey kerd.

 

Gulîstan Atasoy dîyar kerd ke armancê konferansî awankerdişê metodêk cuya komunal o û wina va: “Ewro, ma hemrayê xo yê ke têkoşînê semedê îdarekardişê herêmî de cuya xo bedelnayî û yê ke zîndan û surgun de têkoşîn dayî anê vîr. Ma do pê dir ameyoxêk azad awan bikerê. Ma prosesêk muhîm weçînitişê 31ê adare pey xo de verda. Yew madeyê esasî yê têkoşînê azadîya cinîyan îdarekardişê herêmî yo. Ma nê berpirsîyarîyê xo dir xebatanê xo domnenê. Îradeyê cinîyan 31ê adare de hêza xo mojna. Hêrişêk xidar hemverê îradeyê cinîyan est o. La cinîyan rêxistinê xo xurt kenê û hemverê nê de bi israr vindertî. Ma bingehê prensîba beşdarîye amadekerdişanê konferansî ser o kerd.”

 

Rexnekerdiş û xorexnekerdiş

 

Gulîstan Atasoy dîyar kerd ke ê xebatanê xo bingehê rexnekerdiş û xorexnekerdişî ser o domnenê û wina dewam kerd: “Pêvînayîşê bi paradîgma çiqas pîlêr bibo, ma do hende xurtêr bê. Eke ma paradîgma ra dûr bikewê, ma do bikewê xafikê sîstemê kapîtalîstî. Nê konferansî de proseso ke Rayberê Şarê Kurdî Abdullah Ocalanî dest pêkerd zî ame munaqeşekerdiş û muhîmîyê ci ame dîyarkerdiş. Rojeva konferansê ma na bî ke ma xebata xo konseptê komunan ser o bidomnê û bica bîyarê. Ma do pêwa rêxistinê komunal awan bikerê û awankerdişê paradîgma de rolêk serkêş kay bikerê. Ma do nê konferansî ra xurtêr bivejê û hîna zêde cigêrayîşê cinîyan ser o vinderê. Sey cinî, ma do bi aqilê kolektîf hewldayîşanê xo yê rêxistinkerdeyî ver bi serkewtişî berê.”

 

Konferanso ke çapemenîye ra girewte bi dewam keno.​​​​​​​​​​​​​​​​