ÊLIH - Cinîyan derheqê prosesê ‘Aştî û Cimatê Demokratîk’ de erjnayîşî kerdî û dîyar kerdî ke ganî semedê Serekê Şarê Kurdî Abdullah Ocalanî şert û mercê azadî yê ke bieşko bişixulîyo bêrê awankerdiş.

 

Pêwa vengdayîşê ‘Aştî û Cimatê Demokratîk’ yê ke Serekê Şarê Kurdî Abdullah Ocalanî 27’ê Sibata 2025’ine de kerdo ra dima, Qanûnê Daîmî bi nameyê ‘Qanûnê Derheqê Xurtkerdişê Paştdayîşê Neteweyî û Yewparebîyayîşê Cimatî’ ame hazirkerdiş û 10’ê Tebaxe de Heyetê Pêroyî yê Meclîsî de ame qebûlkerdiş. Derheqê bêçekbîyayîşê ke qanûn de ameyê destnîşankerdiş, raporê eşkerakerdiş û tespîtkerdişî yê Heyetê Asayîşê Neteweyî (MGK) yeno pawitiş û nokteya ke proses baş bidomîyo serê statûyê huqûqî yê Serekê Şarê Kurdî Abdullah Ocalanî ser o yeno vindertene.

 

‘Ganî gamî yewhetî nêbê’

 

Aktîvîsta TJA’yî Ruken Zeryam Işik neql kerd ke semedo ke proses bidomîyo ganî semedê Serekê Şarê Kurdî Abdullah Ocalanî zêdeyêr îmkan û şertî bêrê awankerdiş û wina vat: “Proses teyna Kurdistan û Tirkîya de nê heme Rojhelatê Mîyanênî de veng da. Semedo ke proses daîmî bibo ganî waştişî bêrê caardiş. Ganî statûyê Abdullah Ocalanî zemînê huqûqî de bêro şinasnayene. Proses zaf muhîm o. Ganî şert û merc semedê her di hetan têduşt bibê ke gamî bêrê eştene û pêfamkerdiş hîna zêde bibo. Semedê nê çîyî ganî ziwanêko pozîtîf bêro şixulnayene. Ganî proses şaran rê bêro fehmkerdiş ke sey prosesanê vîyartan nêbo.”

 

‘Ganî dewlete game bierzo’

 

Hemsereka Partîya Herêmanê Demokratîkan (DBP) ya Êlihî Mehdiye Demîr zî wina ard ziwan: “Vengdayîşê Birêz Ocalanî muhîm û bi erj o. Prosesêko di serrî yo ke dest pêkerdo est o. Semedê ma bi erj û muhîm o. Bi serran o her kes nê şerî ra tesîrdar bi. Ganî êdî no şer û şîdet bivindero. Ganî Abdullah Ocalan şertanê azadîyan de bişixulîyo. Ganî tepişteyê nêweşî û pêro tepişteyê bînî bêrê azadkerdiş. Ganî qedexeyê vernîya ziwanî bêro wedaritiş. Na babete de qanûnî bêrê vejîyayene.”

 

‘Ganî qanûnî bêrê vejîyayene’

 

Hemsereka DEM Partî ya Êlihî Gulten Demîr Muratoglu zî wina vat: “Ma wazenê proses baş bidomîyo. Ma serekê xo dir bawer ê. Ganî Kurdan rê qanûnî bêrê awankerdiş. Ma hema paweyê nê qanûnî de yê. Ma wazenê bîyayîşê kurdan bêro qebûlkerdiş.”