RIHA – Di roja 3'yem a meşa Amarayê de kesên li Pirsûsê hatin qetilkirin hatin bîranîn û peyama "33 nemirin, di têkoşîna me de dijîn" hat dayin. 

 

Meşa ji aliyê Meclîsa Ciwanan a Partiya Wekhevî û Demokrasiyê ya Gelan (DEM Partî) ve bi şîara "Em bi Civaka Demokratîk ber bi azadiyê ve dimeşin" li navçeya Pirsûsê ya Rihayê dewam dike.  Ciwanên li ber Rêxistina Navçeya Partiya Dem li hev civiyan, bi dirûşmeyên  "Bê Serok jiyan nabe" û "Ciwan Fedaiyên Apo ne" ber bi Navenda Çanda Amara ve meşiyan.

 

Meşvan gihiştin Navenda Çandê ya Amara û li wir daxuyanî dan. Di daxuyaniyê de timî dirûşmên "Zext nikarin me bitirsînin", "Wê hesabê Pirsûsê bê pirsîn" û "Şehîd namirin" hatin berzkirin.

 

 

'33 nemirin, di têkoşîna me de dijîn'

 

Di daxuyaniyê de hat diyarkirin ku komkujiya li Pirsûsê îxanet e û wê hesabê vê komkujiyê bipirsin û soza têkoşînê hat dayîn. Di daxuyaniyê de hat gotin, "Êrîş hê jî dewam dikin. Em ji vir bang li dewletê dikin; dev ji van provokasyonan berde. Em ji bo aştiyê dimeşin. Heta ku provokasyonên dewletê bidomin wê berxwedana welatiyan dewam bike. 33 nemirin, di têkoşîna me de dijîn."

 

Dayika Aştiyê Aynur Yilmaz ku piştre mafê axaftinê girt, diyar kir ku aştî tiştekî baş e û azadiya fîzîkî ya Abdullah Ocalan xwest.

 

Piştî daxuyaniyê li cihê ku 33 kes lê hatin qetilkirin qurnefîl hatin danîn.