COLEMÊRG -Rojnameger Evîn Buldan a di sala 2017'an de li Amedê ji ber krîza dil jiyana xwe ji dest da, di 8'emîn salvegera jidestdayîna jiyana xwe de bi pêşengiya MKG û DFG'ê li ser gora xwe bi girseyî hat bîranîn.

 

Edîtora Rojnameya Rojeva Medya Evîn Buldan a ku di sala 2017’an de li Amedê ji ber krîza dil jiyana xwe ji dest da, di 8’emîn salvegera wefata xwe de li navçeya Gever a Colemêrgê li ser gora xwe hat bîranîn. Bîranîna ku li Goristana Bajêrge hate lidarxistin; Kalê Evîn Buldan Necdet Buldan, xizmên malbatê, Komeleya Rojnamegerên Jin a Mezopotamyayê (MKG), endamên Komeleya Rojnamegeran a Dîcle Firatê (DFG), Rêxistina Herêmên Demokratîk (DBP), Partiya Wekhevî û Demokrasiyê (DEM Partî) a Colemêrgê û rêveberên berê yên HDP'ê yên navçeya Geverê û HDP'ê ya Colemêrgê. beşdarî bîranînê bûn. Dayik û bavê Evîn Buldan ên li Wargeha Mexmûrê dijîn, nekaribûn beşdarî bîranînê bibin.

 

'Têkoşîna heqîqetê wê tu carî bêdeng nemîne'

 

Di bîranînê de pankarta "Em te ji bîr nakin" ya ku wêneyê Evîn Buldan li ser bû hat vekirin. Çalakî bi deqeyeke rêzgirtina ji bo kesên di têkoşîna azadiyê de jiyana xwe ji dest dane dest pê kir. Li ser navê MKG'ê Rojnameger Ruken Polat axivî û diyar kir ku ew Evîn Buldan bi rêzdarî û minetdarî bibîr tînin. Rûken Polat da xuyakirin ku kevneşopiya çapemeniya azad bûye şoreşeke domdar û got, "Kevneşopiya çapemeniya azad kevneşopî û mîrateyek e ku tevî hemû zext û polîtîkayên tirsandinê, îşkence, girtin, binçavkirin û komkujiyan di nava têkoşînê de ye. Hevala me Evîn Buldan mîrateya heqîqetê ji me re hişt û me ev mîrateya têkoşînê ji Evîn girt. Em şopdarên têkoşîna Evîn Buldan û hevrêyên wê Cîhan Bîlgîn, Hêro Bahadîn û Gulîstan Tara ne.  Têkoşîna heqîqetê wê tu carî bêdeng nemîne. Mîrateya ku Evîn Buldan hiştiye me mîras girtiye û em soz didin ku em ê vê mîrateyê bigihînin cihên herî bilind."

 

'Ji bo Kurdistana azad têkoşîn da û jiyana xwe ji dest da'

 

Kalê Evîn Buldan Necdet Buldan jî got, "Xeyala Evînê Kurdistaneke azad bû. Ji bo vê bi salan li ber xwe da û ji bo vê yekê jiyana xwe ji dest da. Ez Evîn û hemû şehîdên çapemeniyê bi rêzdarî bibîr tînim."

 

'Çapemeniya azad her tim xwedî cihekî cuda ye'

 

Hevserokê Navçeyê yê DEM Partiyê Ercan Sevmez jî diyar kir ku ew hemû şehîdên çapemeniyê bi rêzdarî û minetdarî bi bîr tînin. Ercan Sevmez got: "Çapemeniya azad her tim di têkoşîna azadiya Kurd de cihê xwe girtiye. Çapemeniya azad li cihekî ku berpirsyariyên dîrokî hildigire ser milên xwe ye. Demokratîk' Xeyala azadiyê ya Evînê ye û ev xeyala hemû gelê me ye ku di vê dozê de jiyana xwe ji dest dane."

 

Piştî axaftinan, bîranîn bi danîna qurnefîlan li ser gora Evîn Buldan bi dawî bû.