RIHA - Endamên Meclîsa Ciwanên DEM Partiyê, diyar kirin ku armanca meşê pêkanîna azadiya fîzîkî ya Rêberê Gelê Kurd Abdullah Ocalan e û gotin: "Dema ku em azadiya Rêber Apo misoger bikin wê jin jî azad bibin."

 

Meclisa Ciwanên Partiya Wekhevî û Demokrasiyê ya Gelan (DEM Partî) bi boneya 76’emîn rojbûna Rêberê Gelê Kurd Abdullah Ocalan ji Amedê ber bi gundê Amara ya navçeya Xelfetî ya Rihayê ve dest bi meşê kir. Ciwanên ku ji Amedê bi rê ketin, gihiştin navçeya Pirsûsa Rihayê. Meşa ciwanan a bi dirûşma "Em bi civaka demokratîk ber bi azadiyê ve dimeşin" wê di 4'ê Nîsanê de li Amara ku Abdullah Ocalan lê ji dayik bûye bi dawî bibe.

 

Ciwanên ku beşdarê meşê bûn ji ajansa me JINNEWS'ê re axivîn. 

 

 

‘Dema Rêber Apo azad bibe jin jî dê azad bibin' 

 

Endama Meclîsa Jinan a DEM Partiyê Rumeysa Bozkurt ku destpêkê axivî, bal kişand ser armanca meşê û wiha bi lêv kir: "Armanca meşa me ew e ku azadiya fîzîkî ya Rêberê Gelan Abdullah Ocalan pêk bînin. Weke jin em bi pêşengiya jinan ber bi Amarayê ve dimeşin. Em ê bi modela şoreşa jinê ya Rojava ve bimeşin heta Amarayê. Berxwedana li Sîweregê moralek mezin da me, Rêber Apo li cihê ku lê ji dayik bûye, em ê destpêkeke nû bikin. Em bi taybetî jin pir kêfxweş in. Di xala ku em azadiya fîzîkî ya Rêber Apo misoger bikin, em jin wê hîn bêhtir azad bibin. Em ê bi jinên ciwan civaka demokratîk ava bikin, em ê bibin pêşengên vê."

 

 

‘Em ê azadiya Rêber Apo pêk bînin' 

 

Rumeysa Bozkurt diyar kir ku di bangawaziya "Aştî û civaka demokratîk" de berpirsyariyeke mezin a ciwanan heye û got: "Gel hembêz dike, moral dide me. Her qîrîna jinê nîşan dide ku em ê çawa zincîrên tecrîdê bişkînin. Rêber Apo bingeha avakirina modernîteya demokratîk e. Em di pêvajoyeke wisa de ne ku em bi hêz û bi moral in. Em ê rojbûna Rêber Apo bi awayekî xurt pîroz bikin. Rêber Apo di banga xwe de berpirsyariyeke dîrokî ji me re dihêle, em ê banga aştî û civaka demokratîk bi rêxistin bikin. Heta ku em bi awayekî komînal xwe birêxistin dikin jî bandorê li ciwanan dike. Weke jinên ciwan em pêşengên vê pêvajoyê ne, em ê li ser vê bingehê gel bi rêxistin bikin.”

 

 

‘Ji her derê ciwan tevlî meşê bûn' 

 

Endama Meclîsa Jinên Ciwan a Kongereya Demokratîk a Gelan (HDK) Şeval Çaşurluk, diyar kir ku ciwanên ji her du bajarên Tirkiye û Kurdistanê ji bo azadiya fîzîkî ya Rêberê Gelê Kurd Abdullah Ocalan bi coşeke mezin hatin pêşwazîkirin û wiha axivî: "Me di pêşengiya Meclîsa Ciwanên  DEM Partiyê hem li Tirkiyeyê hem jî li Kurdistanê meşeke bi heybet hat plankirin. Em dixwazin daxwaza xwe ya azadiya fîzîkî ya Rêberê Gelê Kurd Abdullah Ocalan mezin bikin."

 

 

'Em bi coş û bi moral in'

 

Şeval Çaşurluk wiha dawî li axaftina xwe anî: "Meşa me pir xweş, bi heyecan bû. Em hemû ciwan pir bi kelecan bûn. Meşa me dê li cihê Birêz Abdullah Ocalan jê dayik bûye bi dawî bibe. Ne tenê ciwanên Kurdistanê li vir in, her wiha rêhevalên me yên pêkhateyên din jî bi me re ne. Dayikan bi kulîlkan me pêşwazî kirin."