RIHA - Çalakîya "Nobeta Edaletî" ya keyeyê Şenyaşarî vernîya Edliyeyê Rihayî de 162 rojî yo dewam kena. Keyeyî serê Twîtterî de nê mesajî da: "Şima nêeşkenê berpirsîyarî ra biremê."

 

Çalakîya “Nobeta Edaletî” ya Keyeyê Şenyaşarî vernîya Edliyeyê Rihayî de roja 162yîne de dewam kena. Emîne û Ferît Şenyaşar yê ke saetê serê sibayî ameyî vernîya edlîye, meydanê ke sey “Quncê edaletî yê keyeyê Şenyaşarî” yeno binamekerdiş, dest bi nobeta xo kerdî.

 

Keyeyî, pankartê ambûlansa ke wexto Pî Haci Esvet û lajê ey Celal û Adil Şenyaşar ci de bî û hêriş ame kerdiş, daliqna û nuşteyê “14ê hezîrana 2018 de Nêweşxaneyê Dewlete ya Pirsûsî de pî û 2 lajê ey ameyî qetilkerdiş. 3 serrî yo yew tepişte zî çin o! Wa huqûqê serdestan peynî bibo. Semedî herkesî edalet” dayî verê blokê betonî yê vernîya edliyeyî, têkoşînê xo yê edaletî kesê ke rayîrê edaletî ra derbaz beno, rayîrê înan keweno edliye rê qal kerdî.

 

Keyeyî serê hesabê xo yê twîtterî bi etîketê #SemedêKeyeyêŞenyaşarîEdalet mesaj pare kerd: "Hemverê waştişê dayika ke mêrde û di lajê ci nêweşxaneyî de ameyî qetilkerdiş selahîyetdarî bêveng bîyê. Şima nêeşkenê rastiyan û berpirsyarî ra biremnê."