BEDLÎS - Verfeka TJAyî ya Bedlîsî Sureyya Aydin derheqê polîtîkaya qeyûmî de ercnayîş kerd û wina vat: “Îqtîdaro ke cewabêko waşt Birêz Ocalanî ra nêgirewt, dest bi hêrişê hemverê Rojawanî kerd. Badê cû hêrişê destkewtişî kerd. Îqtîdar kewt zorî. Bi no hawa zî wazeno bi qeyûman xo bido ciwîyayîş.”

 

Polîtîkaya qeyûmî bi serran o ke yena kerdiş, hîrê demî yo yena caardiş. Prosesê weçînayîşê 31ê Adare ra 7 aşmî derbaz bî û 7 aşman de semedê 7 şaredarîyan qeyûm ame tayînkerdiş. Semedê şaredarîyê Colemêrgî, Mêrdîn, Êlih, Xelfetî û Dêrsimî yê DEM Partîye û semedê şaredarîyê Esenyurtî û Pulurî de CHPyî qeyûm ameyî tayînkerdiş. 

 

Bi tayînkerdişê qeyûman ke îradeyê şarî çin o ame hesibnayîş, heto bîn ra zî sîstemê hemserekî hedef ameyî girewtiş. Verfeka Têgêrayîşê Cinîyanê Azadan (TJA) ya Bedlîsî Sureyya Aydin derheqê babete de qisey kerd.

 

‘Îqtîdar bi hêrîşan hewl dano ke lingan ser o bimano’

 

Sureyya Aydin wina qal kerd: “Îqtîdar bi hêrişê hemverê şarî hewl dano ke lingan ser o bimano. La ma nê tayînkerdişê qeyûman vînenê ke îqtîdar êdî vînî kerdo. O zî ferqê nê de yo. Qeyûm ewil bi Colemêrg dest pêkerd. Badê cû bi Esenyurtî dewam kerd û badê tayînkerdişê Mêrdîn, Xelfetî û Êlihî kerdî. Tayînkerdişê Mêrdînî esas de hemverê aştîye bî. Birêz Abdullah Ocalan Xelfetî de amebî dinya. Êlih de zî hemverê îradeyê cinî hêriş pê ame.”

 

‘Cinî meydanan de yê’

 

Sureyya Aydin dewam de wina vat: “Xoverdayîş di hewte yo Êlih de dewam keno û nika zî Dêrsim de dewam keno. Eynî wextî de do pêro dinya bivîno ke şarê kurdî, ê verê nîyê. Sere de cinî meydanan de yê. Hemverê qeyûman meydanan de yê. Ganî AKP-MHP dest nê polîtîkayan ra vera bido. Ma êdî nê polîtîkayan qebûl nêkenê.”

 

‘Îqtîdar cewabo ke Ocalanî ra waşt nêgirewt’

 

Sureyya Aydin tewr peyîn wina vat: “Îqtîdar bi endîşeyê ‘ma do senî zor ra vejîyê’ destê xo derg kerd. Nê ser de Îmraliyî dir pêvînayîş kerd. Îqtîdaro ke cewabêko waşt nêgirewt, ancî bi qeyûman hêriş kerd. Bi destbendkerdiş, tepiştiş û îşkence cewab da. Vernê de hêrişê Rojawanî kerd. Bi qeyûman wazeno xo bido ciwîyayîş.”