KONYA - Hakîm Dal Meram de netîceyê hêrişê nîjadperestî de dinyaya xo bedilna. Dimayê nê 4 birazayê ey ke emrê înan qij o rastê hêrişê nîjadperestî ameyî. Gumanbarî serê gerrekerdişî de ameyî destbendkerdiş la dima ra serbest ameyî veradayîş.

 

Qezaya Meramî ya Konyayî de Hakîm Dalo Amedij seba ke kurd bi bi hêrişê komêke nîjadperestan dir rî bi rî mend û 21ê temmuze de ame qetilkerdiş. Dimayê serebûtî çarçewaya tehqîqatî de pêwa ke yewî ra zêdeyêr gumanbar ame tespîtkerdiş zî, kesêk ame tepiştiş. Hakîm, netîceyê polîtîkaya bêcezabîyayîşî de ame qetilkerdiş. Dimayê nê 4 birazayê Hakîm yê emrê înan mabêne 14-16 de yê bi nameyê B.D, E.D, T.D û Z.D rastê hêrişê nîjadperestî ameyî.

 

Birayê Hakîmî, Hamdî Dal dîyar kerd ke 13ê tebaxe de 4 birazayê ci taxa Kaşihani ya Meramî de wexto şîne heywananê xo bigîrê, vernîya înan ameya girewtiş û hetê Mustafa, Dogan û komêke ra rastê hêrişî ameyê. Hamdî dîyar kerd ke keyayê taxe zî nîjadperestî vila keno û vat, vernê de tûtî rastê heqaret û nengan ameyî û dima zî rastê şîdetê fîzîkî ameyê. Hamdî wina vat: "Keyayê dewe însanan kom kerdê û ardê. Vato, ‘ez keyaya' û nengan çînayo."

 

Heywanan rê nengî 

 

Hamdî wina bale ant serê helwestê keyayê dewe: "Wexto tûtan heywananê xo girewtê, keya vato, 'Nê heywanê Amedijan ê' û nengan heywanan rê çînayo. Dima ra şîdet bi tûtan kerdo. Keya dewijan ra 50 kesî kom kerdo û serê birazayanê mi de berdo. Wexto ma şî cayê serebûtî koma nîjadperest xo antibi."

 

Hêrişkarî reyna ameyî veradayîş 

 

Hamdî diyar kerd ke seba Kurdbîyayîşê rastê nê hêrişan ameyo û wina vat: "Keya şîyo kahwe û vato, ‘Kurdî wina yê’ û her kesî kom kerdo. Dimayê serebûtî ma raporê derbî girewt û ma şî qerekole. Îfadê tûtan ame girewtiş. Koma hêrîşkarî dima ra amî veradayîş."

 

'Ez o nê edaletî ra vajî çi'

 

Hamdî peynîya qiseykerdişê xo de vat, birayê ey Hakîm netîceyê hêrişê nîjadperestî de ameyo qetilkerdiş û wina qedêna: "Yê ke kerdê dîyar ê. Dewlete zî zana. Her kes zano. 50-60 kesî kesêk kişt la hîna yew kesêk tepişte yo. 60 kes sûc kenê la yew  ci ra tepiştî. Ez o nê edeletî ra va jî çi. Gelo edeletêk wina, qanûnêk wina esto?"