Rojda Aydin

 

ŞIRNEX - Keyeyê tepişteyan, dîyar kerdî ke ganî waştişê tepişteyan grevê vêşanîye bêrê qebûlkerdiş û veng dayî hukmatî ke ganî tecrîd bêro wedaritiş.  

 

27ê teşrîna peyêne 2020 de zîndanê herême û Tirkîya de hemverê tecrîdê Rayberê PKKyî Abdullah Ocalanî û binpaykerdişê heqan yê zîndanan, tepişteyî kewtî çalakîya grevê vêşanîye ya bêdem û bidor û grev 266 rojî yo dewam keno. Paştdayîşê semedê çalakîya grevê vêşanîye ke zîndanan de destpê kerdo dewam kena. Keyeyê tepişteyan derheqê rewşa tepişteyan de û waştişê tepişteyan de fikrê xo ajansê ma dir pare kerdî.

 

Di tûtê ci tepişteyê

 

Nermîye Îverendî ke di tûtê ci zîndanê cîya de yenê tepiştiş, dîyar kerd ke lajê ci Abdurrahman Îverendî yo ke 13 serrî ceza ci rê ameya birnayîş, 9 serrî yo tepişte yo û mîyanê 8 serrî de zî 5 rey ameyo surgunkerdiş û wina vat: "Lajê mi Mêrdîn de ame tepiştiş û ey şawitî Îzmîrî serrêke û 6 mengî zîndanê Îzmîrî de mend. Îzmîr de zî reyna surgunê Şirnexî ame kerdiş û ûca de zî 6 mengî mend. Ûca ra zî dima ra surgûnê Gûmûşhane kerdî û tewr peyîn şawitî zî ey şawitî Zîndanê Panosê Agirî. Zîndanê Patnosî de zî nika rewşa înan nêbaşa. Tûtê ma ûca de nêweş kewenê, înan nêbenê nêweşxane. Seba ke înan berê nêweşxane waştişnameyê ke nuştê nînê qebûlkerdiş. Rojnameyan nêdenê înan, kitab û radyo înan ra girewtî. Nêweşîya lajê mi Abdurahmanî cîya estê. Qeza derbaz kerdibî û nika bi gampole rayîra şino. Lajê mi Botan Îverendî zî nika zîndanê Tîpê D yê Amedî de yeno tepiştiş. Botanê mi zî bi 5 serrî yo tepişte yo. Xeylêk nêweşîyê lajê mi zî estê. Nika lajê mi hem nêweşiya ey mîdeyî esta, nêweşîya  gurçikan anceno û demarêk sereyê ey zî xetimnaye yo."

 

'Seba pêvînayîşê telefonî ceza' 

 

Tepişteya nêweşe Tenzîle Acar (23) a ke 2017 de Stenbol de ameye destbendkerdiş û berdî Zîndanê Cinîyan ê Bakirkoyî, zîndan de teşhîsê Hepatît B ci rê amebi dayîş. Tenzîle de dima ra nêweşîya weremî ameye tespîtkerdiş. Dayîka aye Rasmiye Acar zî bale ant serê rewşa kênaya xo wina vat: "16 serrî ceza dayî kênaya mi. Nêweşîya kênaya mi her ke şina aver şina. Bi aşmêke zêdeyêr o ez kênaya xo dir qisey nêkena. Wexto ke serekî bi keyeyî xo dir 4 deqeyan qisey kerd zî na rewşe boykot kerd û aye zî 4 deqeyan ma dir qisey kerd. Dima ra îdarekarê zîndanî cezaya pêvînayîşî dayo tepişteyan. Ez nika nêzana rewşa kênaya mi senîn a. Tûtê ma nêweşê û zîndan de zulm û zordarî înan rê yeno kerdiş. Wa peynîya nê cezayan bîyarê. Tûtanê ma nêbenê nêweşxane û dermanê înan nêdanê. Hukmat wazeno ke tûtê ma bimirê. Bi kelepçeyan benê nêweşxaneyan. Tûtê ma nê çî qebûl nêkenê û dermankerdiş red kenê. Rewşa tûtanê ma giran a. Wa înan vera bidê ke bêrê dermankerdiş."

 

'Ganî tu kes bêveng nêmano'

 

Rasmîye tewr peyîn wina vat: "Dewletêka wehşî esta. Dermankerdiş û waştişê tûtanê ma bi ca nêanê. Coka zî tûtê ma bedenê xo dayê verê vêşanî. Însanî û huqûqê hukmatê AKPyî çin o. Tûtê ma vanê heta serek azad nêbo ma zî azad nêbenê. Coka na çalakî dayê destpêkerdiş û dewam kenê. Ma zî sey keyeyê tepişteyan paştdayîş danê na çalakî. Ma wazenê demêk nêzdî de Serekî dir pêvînayîş bêro kerdiş û keyeyê ey şêro verê ey. Ma rewşa Serekî ra endîşeyîn ê. Ma êdî cuyêka azad û têduşt wazenê. Sewbîna serê tûtanê ma dir zî tecrîdêko giran esto. Ganî tu kes bêveng nêmano."