Nişmiye Guler

 

MERKEZÊ XEBERAN - Bêtehemulîyê hemverê Kurdkî yê pêşkêşwane Dîdem Arslan Yilmaz, esasê xo de parçeyêk qij ê sîstemo ke ameyo awankerdişî ya. Ma serê parçe de nêvinderê, ma pêroyî biewnê...

 

Hewteyo vîyarte de babeta tewr zêde ameye qiseykerdiş aye bî ke pêşkeşwane Dîdem Arslan Yilmaz ke bernameyê xo de vernîya qiseykerdişê Kurdkî ya cinîyêke girewtebî û vatibî: "Nêeşkena  heqeret kênayan rê bikero, nêeşkena bi kurdkî zî qisey bikero. Dima ra zî vatibî; ez tay zî Kurdkî fam kena. Qetî nêeşkenê eme xo dir qisey bikerê, wa Tirkî qisey bikero. Ma do heme fam bikerê, tîya Komara Tirkîya ya. Sewbîna ma nê ziwanî nêzanê. Eke ma bizanayîne ma do qisey bikerdêne." û telefon serê cinî de pada bî. Bêşik reaksîyonî dima ra ameyî mojnayîş. Platformê bînî çapemenîye seba Dîdem Arslan Yilmaz reaksîyonê xo yê ‘hedê xo bizane’ ame ramojnayîş û derheqê aye de muracatê sûcî ame kerdiş. Reaksîyon wina zêde bi ke çapemenîya hetgir zî mecbûr mende babeta Dîdem Arslan Yilmaz weşan bikero. Dima ra Dîdem Arslan Yilmaz eşkerayîyêke û rexneyê hemverê xo ‘komîk’ dîya. Pawitişê 'Bêtêduştî nêkerda' kerd, la kerd xo vîr ra ke verê bernameyê xo de wergerê îngîlîzî kerda.

 

Tîya de çîyo esas oyo ke ma ser de vinderê, esas de şexsê Dîdem Arslan nîyo, sîstemo ke ci de ya û nêzdîbîyayîşê sîstemê hemverê Kurd û Kurdkî yo. Dîdem Arslan Yilmaz ewil nîya û ne zî do peynî bo. Seba ke oyo ke nîjadperestî wey keno îqtîdar û çapemenîya hetgira aye ya.

 

'Wayê û birayê min ê Kurdî' êdî klasîk bîyo

 

Eke bêro vîrê şima serekkomarê AKPyî Tayyîp Erdogan mengê vîyarte de amebi Amed û vatişê klasîk yê ‘wayê û birayê min ê Kurdî’ her vatişê xo de ardibi ziwan. Qiseykedrişê xo de zî şarî bi Kurdkî silam kerdibi û vatibi, 'biewnê ez senîn musaya' û hewce dîbi ke bi şarî bido teyîtkerdiş. Bêguman vatişê Tayyîp Erdoganî yê ‘wayê û birayê min ê Kurdî’ hacetê sîyasî yo. Çira gelo? Demo merdim 19 serrî îqtîdarê AKPyî ra ewnîyeno û metodê têkoşînê Kurdan ê 20 serrî yê peynî nê eşkera ramojneno.

 

TRT 6 ke zaf vatişê Tirkî keno mîyanê Kurdkî

 

Ma nimuneyê ke bidê. Kurdî bi serran o seba heqê perwerdeyê bi ziwanê dayîke têkoşîn kenê. Cewabê îqtîdarî yê sey hacetêk weçînayîşî awankerdişê TRT 6 o. Wexto ke merdim vernê de ewnîyeno, goşê merdimî rê weş yeno. La bi pêroyî binê kontrolê îqtîdarî de yo û goreyê xo Kurdkî ramojnenê, xeylê vatişê Tirkî erzenê mîyan. Xeylêk Kurdî nê kanalî keyeyê xo de anêkenê û temaşe nêkenê.

 

Çapemenî de Kurdî estê la esasê xo de çin ê!

 

Reyna kanalê aîdê çapemenîya hetgir de bername, rêzefîlm, musabaqa û sewbîna derheqê kurdkî û Kurdan de çîyêk çin o. Ha gelo şima vanê qey tu çîyêk derheqê Kurdan de nêdanê? Bi sînor bo zî danê. Çapemenî de xeylê kesî seba ziwanê xo qisey kenê terorîst yenê îlankerdiş, zabitnameyê meclîsî, zabitnameyê zîndanî de ziwanê sey ‘x’ yan zî ‘nîno zanayîş' o. Platformanan de qiseykerdişê înan yeno astengkerdiş, hêrişê nîjadperestî yenê kerdiş la xeberan de vanê ‘xusumet estbi.' Benê babeta çend rêzefîlmê televîzyonan, la senî... Karekterê sey lîderê mafya, rotişê tiryakî ramojnenê. Kurdêk/e tu wext karekterêk baş nîyo/a yanî rêzefîlm û fîlmê televîzyonî de. Têkoşînê Kurdan ê bi serran yeno dayîş nêvînenê û wina têgêrenê. Yanî sey şima fam kenê çapemenî de Kurdî estê la esas de çin ê. La sey şima zanê na cografayêka bi mîlyonan Kurdî ciwîyenê yê.

 

Çapemenî yew parçeyê çinkerdişî ya

 

Hetêk ra Kurdê ke îqtîdar û çapemenî awan kerdê. Heto bîn ra zî Kurdê ke bi têkoşîn destkewtê. Îqtîdar û çapemenîya ke tehemulê înan destkewtişan rê nêkena esta. Wedaritişê tabelayê Kurdî, vurnayîşê nameyê Kurdî yê kuçeyan, yê sazgehan, gelo nê caardişî tena şexsê qeyûman de ameyî tayînkerdiş de bi ca ameyî?  Bêguman neyy? No qeyûm parçeyê nê sîstemî de ameyo awankerdiş. No parçeyêk qij yê çinkerdişî yo.

 

Yanî nê vatişê Dîdem Arslan Yilmaz û reaksîyonê çapemenîya hetgir vera nê zî bi pêroyî parçeyê sîstemî yo. Ganî ma ma vera hêrişê nîjadperestî, çinkerdişî bi hawayêke xurt wayîrê erjê xo û ziwanê xo vejîyê.