Sena Dolar

 

STENBOL - Esnafê bazarê Beyoglu dîyar kerdî ke çîyêk înan nîno rotiş û welatijan zî vat, ê nêeşkenê lazimîyê xo bigîrê. Her çiqas seba dayîş û girewtîşî saete şanî de bêro pawitiş zî tabloyê vayîye nêvuryeno.

 

Semedê pandemî û polîtîkayê AKPyî, krîzê ekonomî û feqîrî her ke şino giran beno. Seba zamê gaz, ceyran, awe û xidayan yeno kerdiş, welatijî rojê zehmet ancenê. Welato ke meaşê asgarî sînorê veşanî ra kêmî yo, saetê şanî de reyna welatijî nêeşkenê sebze û fêkî bigîrê.

 

Bazar de tewr zêde rewşa esnafê cinîyan bale anceno. Cinî seba krîzê ekonomî keda xo ya ke nîna vînayîş, benê bazaran. Ma derheqê krîzê ekonomî de fikrê welatijê ke bazarê Beyoglu de bî girewt.

 

'Bazar vay o'

 

Bahare vat, fature zaf vay ê pêwa ke di kesî keye de ciwîyenê faturayê înan zaf zêde yeno û vat: "Bazarî vay ê. Kîloyêke îsot 5 lîra yo. Gizêrî 6-7 lîrayê. Hêzê ma bibo ma gênê çinîbo ma dest veng agêrênê."

 

'Çîyo ke erjan çin o' 

 

Hade Guzçay zî wina vat: “Seba gaz û ceyranê zamî ame. Awe zî wina. Ez nêeşkena bidî. Ez dayîş û girewtiş zî kêm kena. Her çî vay o. Çîyêk erjan çin o. Çîyêk 10 lîra bo, ez eşkena tena bi 5 lîra bigîrî.”

 

'Ma vanê belkî erjan bibo la nêbeno'

 

Sebahat Doludîzgîn ke bazar de 4 serrî yo şalpe û berardişê destan roşena wina vat: "Ez hema zî pawena ke çîyêk biroşî. Şima ciwînan vînenê, kar çin o. Nêeşkenê  debara xo bikerê. Ma zî wina îdare kenê. Me mecbûr ê. Merdimî nêeşkenê çîyêk bigîrê û biwerê. Binê 10 lîra, 7 lîra de fêkî çin ê. Hîn eşkenê bigîrê, hîn nêeşkenê bigîrê. Ganî fîyatî kêm bibê. Xiyarî zaf vay ê. Welatî pawenê saetê şanî û wina yenê. Vanê belkî erjan bibo la erjan nêbeno."

 

'Ez lîmonan roşena'

 

Nurcan Onder zî serê tezgahê xo de lîmon û nan roşena wina vat: " Pandemî tesîrêk nêbaş serê ma de kerd. Mêrdeyê mi muzîkjen o, seba  pandemî di serrî yo nêxebityeno. Ma xeylêk bi tesîr bî. Prosesê pandemî de mi ra vatî, ‘ti nêeşkena nan biroşê.' Mi zî vat, ez nêeşkî nan biroşî, ez o lîmonan biroşî. Pereyê bazarê xo qet nêbo vejî."

 

'Her kes halê xo de yo' 

 

Nerîman Akkuş zî bazar de cil û belgan roşena wina vat: "Ma seba nanê xo hewl danê. Ma cilan erjan roşenê. Her çî zam bîyo. Yê dewlemendî zî êdî nêeşkenê debara xo bikerê. Her kes hewl dano ke xo xelas bikero. Gelo do esnafî se bikerê. Her kes derdê debara xo de yo."