Gulîstan Azak

 

AMED - Cinîyê Amedîyijî derheqê 1ê Êlule de fikrê xo wina vatî: "Caardişê aştî hende zehmet nîyo. Çîyo ke caardişê aştî zehmet keno, zîhnîyetê cîyabîyayîşî, nîjadî û bêtêduştî yo. Çîyo tewr girîng zî nê welatî de problemê kurdî, problemê tirkî esto. La bi hêvîyê ke do rojêke aştî bêro nê welatî."

 

1ê Êlule Roja Aştîye Dinya ya temamê dinya bi çalakîyê cîya yenê pêşwazîkerdiş. Emsar Tirkîya de zî binê veresîye hêrişê nîjadî, operasyonê sîyasî û leşkerî, talankerdişê xoza de yeno pêşwazîkerdiş. Sewbîna emsar bajarê herême 1ê Êlule do bi mîtîng û çalakîyê cîya bêro pêşwazîkerdiş. Amedekarîyê pêşwazîkerdişî bajaran de dewam keno. Pêwa xebate û amadekarîyan ma zî mîkrofonê xo dergê amedîjan kerd û hîs û fikrê înan yê derheqê aştî de girewt.

 

'Azadîya fikr û fehmî çin o' 

 

Esîn Kilinç: Seba caardişê aştî ganî demokrasî aver şêro. Ma welatêkê demokratîk de nêciwîyenê. Ma nêeşkenê fikr û fehmê xo bîyarê ziwan. Bi nê nêzdîbîyayîşî do senî aştî bêro? Sere de azadîya fikr û fehmî çin o. No welatî de fikr û fehmî azad nîyê û her kesî sinifêke înan esta. Seba aştîye ganî fikr û fehmî azad bêrê ziwan.

 

'Bi ziwanê nefretî aştî nîna' 

 

Gamze Yakut: Seba ziwanê nefretî aştî bi ca nîna. Her ziwanê nefretî aver şino, no welatî de caardişê aştî zehmet beno. Seba aştî berpirsiyarîyêk lazim o. Ganî her kes seba caardişê aştî çîyêk bikero. Cayê ke aştî çinî bo, uca de bêadeletî û şer esto. Cayê ke şer bibo uca de merg virazêno. Ganî bêedaletîyê ke nika ma ciwîyenê peynî bibê.

 

'Xeyalê mi caardişê aştîye yê' 

 

Wendekare Berîtan Ceren Aslan: Na herre ser o xoza û cinî yenê qetilkerdiş. No welatî de cinî yenê kiştiş. Cinî seba xo bipawo, mecbûr manena ke hêrişkar bikişo. Ez sey cinîyêke ciwan xeylêk rey bi taciz û şîdetî dir rî bi rî mend. Bi kiştişî ameya tehdîdkerdiş. La ez wazena êdî cinî bi azadî vatişê xo vajê. Dinyayêke azad de biciwîyê. Ez sey welatija amedî şer û merg nêwazena.

 

'No welatî de problemê kurdan ney problemê tirkan esto'

 

Ayşe Dogan: Hemverê kurdan polîtîkayê şer yeno kerdiş û problemê kurdan nîno çareserkeriş. Dişminîyê hemverê kurdan, tirkan rê yeno ferzkerdiş. No çî caardişê aştî zehmet keno. Goreyê mi nê welatî de problemê kurdan ney problemê tirkan esto. Kurdan hertim waştişê aştî kerdo. Kesê ke probleman kûr kenê, kurdî nîyê. Eke aştî nêwazenê, wina bo ganî Kurdistan bêro awankerdiş. Ziwanê kultur û bawerîya ma ameyo qedexekerdiş. Ez 1ê Êlule de ameya dinya. Tena waştişêk mi esto û o zî caardişê aştîye yo.

 

'Zîhnîyetê cîyabîyayîşî ganî werte ra wurzo' 

 

Berfîn Ezîn: Seba polîtîkayê cîyabîyayîşî aştî nîna. Nika zî munaqeşeyê tirk-kurd û elewî-sunnî yeno kerdiş. Seba caardişê aştî ganî sere de no zîhniyet werte ra wurzo. Sewbîna seba aştî zî yewin rayîr yewbîyayîş o. Nimûne; ez Amedîyij a û wexto şina bajaranê Tirkîya hemverê mi de cîyabîyayîş yeno kerdiş. Vanê wayê û birayî la wayê û bira yenê qetilkerdiş. No aştî nîyo. No welatî de tena faşîzm esto. Berpirsîyar zî îqtîdar o.

 

'Ma bi hêvîyê ke do rojêke aştî bêro'

 

Şeval Anik: Eke aştî bibayîne ma do no halî de nêbîne. Wexto aştî bibîne, do wayê û birayî bibîne. La nika biewnê çîyêk winasî çin o. Seba caardişê aştî ganî her kes bikewo mîyanê hewldayîşî. Wexto aştî çînî bo, azadî zî nêbena. Cayê ke aştî çînî bo uca de şer û bêhêvîtî esto. Seba ma aştî cayêka dûrî de ya la ma bi hêvîyê ke rojêke aştî bêro. No çi seba ma girîng o."