Sema Çaglak

 

ÇEWLÎG - Koçerê ke vîrardişê komelî demê vernê de awan kerdê, hema zî xeylêk cayê herême de adetê xo pawenê. Zozan Uvat ke bêrîvantî kena wina vat: "Şert û mercê cuya ma xeylêk zehmet ê la ma cuya mîyanê xoza de xeylêk kesî hes kenê."

 

Cinîyê ke dewa Rîzî ya Darahênê ya Çewlîgî de ciwîyenê, her mewsîm bi zehmetîyê cîya dir rî bi rî manenê. Cinîyê dewe bi destpêkerdişê wisarî dir heta peynîya hamnanî bi bax û baxçeyan dir eleqedar benê. Sewbîna cinîyê ke xeylê xo debara xo bi pesdewarî kenê zî seba weykerdişê pesî verê xo danê zozanan. Nê cinî wesar ra heta payîz zozanan de pes wey kenê.

 

Nê cinîyan ra yew zî Zozan Uvat a. Zozane ajansê ma rê qalê kar û barê xo kerd û rojêke xo qal kerd.

 

Cuya mîyanê xoza weş a

 

Zozan Uvat ke nêzdîyê 20 serrî yo bêrîvantî kena, qalê rojêke xo kerd û vat: "Saete 5ine de aya bena. Vernê de ez manganê xo ancena. Dima ra seba nanî arayî amadekarî kena û karê keyeyî kena. Wexto saete bena 9 ma şinê pes ancenê. Ver bi şanî ma reyke bîn pesê xo ancenê.  Cuya ma ya rojane wina ya. Cuya mîyanê xoza de pêwa zehmetîyan reyna weş a."

 

'Karê ma goreyê mewsîmî vuryeno'

 

Zozane tewr peyîn wina vat: "Zehmetîyê karê ma xora her het ra yeno vînayîş û yeno zanayîş.  Ma pes wey kenê û no kar zî zehmet o. Ma înan benê cayê koyî û zozanan. Sewbîna mewsîmê zimistanî de zî karê ma tewr zêde zehmet beno.  Cuya koçeran de tewr zêde cinî kede danê û yê ke tewr zêde zêde zehmetî ciwîyenê reyna cinî yê. Ma hamnanî şinê cayêk bîn û zimistanî şinê cayêk bîn. Pêwa her zor û zehmetîyê cuya ma ma metodê cuya xo ra hes kenê."