Melîke Aydin

 

ÎZMÎR - Mîraç Mîroglu netîceyê pirodayîşê wesayîtê zirxî de ame qetilkerdiş û gumanbar polîs amebi veradayîş. Îzmîr de cinîyan reaksîyon nîşanê rewşe dayî û diyar kerdî ke ganî heme muxalefet hemverê nê vengê xo berz bikero.

 

Qezaya Hezexî ya Şirnexî taxa Turgut Ozal 3yê êlule de wesayîtê zirxî tuto 7 serre Mîraç Mîroglu kewt û qetil kerd. Polîsê wesayîtê zirxî xebitnayene ame tepiştiş la hetê Dadgerîya Cezaya Sulhî ya Hezexî ra ame veradayîş. Raporê qezayî de zî pêwa ke şahidan vat, lezê wesayîtî zaf zêde bi zî Mîraç bi qusur ame vînayîş. Hemverê qetilkerdişê Mîraçî reaksîyon dewam keno. Îzmîrî de zî siyasetmedarê cinî reaksîyon nîşanê rewşa dayî û dîyar kerdî ke ganî qerekol û kalekol taxan bêro vetiş.

 

‘Wareyê sîvîlî de bîyayîşê wesayîtê zîrxî polîsê şerê taybetî yo’

 

Hemsereka Partîya Demokratîke ya Şaran (HDP) ê Îzmîrî Besriye Tekgur dîyar kerd ke wesayîtê zirxî tena herême kurdan estê û no parçeyêk polîtîka şerî yo pelçiqnayîşî yo û wina vat: “Hema hema sereyê kesî wesayîtêk zirxî esta. Serê kurdan de teda yenê hedefkerdiş. Ma hem serê tutan hem serê cinîyan de vînenê. Bi taybetî panzere dana pey tutan. Ma zî dîmenan vînenê.”

 

‘Dewlete heme Kurdan terorîst îlan kerda’

 

Besriye wina vat: “Dewletê heme Kurdan terorîst îlan kerda. Binê nameyê terorî de herêmê kurdan de nê kena. Vatişêk qij de vanê kurd o/a, terorîst o/a, kerra eşto/a polîs. Tutêk esparê bîsîkletî bîyo, derbazê kîşte bîne beno. Mimkun nîyo ke polîs nêvîno. Kurdan sey merdimî nêvînenê, kişenê û no zî înan rê kar maneno. Ganî wesayîtê zirxî û hêzê asayîşî herême ra vejîyê.”

 

‘Butçe seba tutan ney seba şerî xerc kenê’

 

Îdarekarê Partiya Karkerê Tirkîya (TÎP) ya Tirkîya Ekîn Kamer zî vat, çimeyê seba perwerde, weşîye û heqê bînan nînê visnayîş û seba wesayîtê zirxî rê danê û vat: “Ameyoxê şarî nîno vînayîş. Ganî wesayîtê zirxî wareyê sivîlî ra bêrê vetiş. Tutî uca de bi ters ciwîyenê. Ganî tu wext tutêk çîyêk wina nêciwîyo.”

 

‘Hedef de tutî estê’

 

Ekînê vat, sîstemê kapîtalîzmê otorîter ke dinya de yeno ciwîyayîş, Tirkîya de bi çimsûrî yeno ciwîyayîş û dewlete seba krîzê polîtîk problemê ekonomî nimojnena ra û seba ke bi zor bido qebûlkerdiş muracatê şîdetî kena û vat: “Her cayê welatî de şîdet zêde kerdo. Heqê weşîye, cuye, beden, weşîya tutan hedef de ya. Bi rastî zî terorêk çimsûr heme Tirkîya de vila kerdê.”

 

‘Ganî hesabê nê bidê ma zî’

 

Hemsereka Partiya Kede (EMEP) Emîne Uyar zî vat: “Tûtî keyeyê xo de nêeşkenê zêde dûr şêrê. Pîyê tutî vat, panzere kuçe ra lez derbaz bena. Ganî no bêro perskerdiş. Ma zanê ke bi no hawayî nêzdîyê 40 mergî virazyayî. Sewbîna tu kesî ceza nêgirewto. Mîraç bi formayê Tîmê Futbolê Galatasarayî fotografêk anto. Kulup babeta wina de ganî eşkerayî bidayîne. Ganî tîmê futbolî bi hîsgêr bo. Eke ma aştî biwazê sebebê nê bêrê cigêrayîş. Ganî her kes seba nê têkoşîn bikero, hîsgêr nêzdî bibo.”