ŞIRNEX - 6 dewê Cizîre 10 rojî yê binê ablûqaya leşkeran de yê. Dewijêk nêwaşt nameyê xo bido wina vat: "Tehdîd şarî rê kenê. Wextê sereştişî de ber û pacayê xeylêk keyeyan şikinayî. Dewijî mîyanê tehluke de yê. Leşkerî vanê bi fermanê selahîyetdaran ê do demêk bîn zî tîya de bê.”

 

Herêma Besta, koyê Cudî û Gabar operasyonê leşkerî ke ameyê destpêkerdiş dewam kenê. Operasyonê ke ameyê destpêkerdiş resayî dewanê Cizîre zî. Dewê Cinibrê, Nehribê, Biyakopkê, Batilê, Sirsirkê û Gozik yê girêdayeyê qezaya Cizîre ya Şirnexî 10 rojî yo binê ablûqaya leşkeran de yê. Çimeyê herême pêhesnayî ke netîceyê îxbarêk de 10 rojî yo 6 dewî binê ablûqa de yê û dewî bi hawayêk kêfî ameyî ablûqakerdiş. Dekewtiş û vejîyayîşê dewan de leşkerî ameyê bicakerdiş û wexto ke şatê dewe vejêno yan zî yeno dewe, nasnameyê înan yeno kontrolkerdiş. Goreyê agahîyê ke ma dewijan ra girewto, yeno vatiş ke do heta demêk dewî binê ablûqa de bibê.

 

‘Şarî tehdîd kenê’

 

Welatijêk ke seba asayîşî nêwaşt nameyê xo bido dîyar kerd ke dewan de ablûqa esto, roniştoxê dewe şan de nêeşkenê vejîyê teber û wina vat: “Rîyê ablûqa ra dewijî qerqilîyenê. Şan de kes nêeşkeno vejîyo teber. Seba ke Aşma Remezanî ya tîya fitarî ra pey şar vejîyeno teber la rîyê na ablûqa ra nêeşkeno vejîyo. Ma rewşa zore de yê. Leşkeran sereştişê verênî de xeylêk ber û pencereyî şikitî û keyeyî tehdît kerdî. Leşkeran vat ê do hema dewe de bimanê. Coka ma nêzanê na ablûqa key qedîyena.”