Neslîhan Kardaş

 

WAN - Ayşe Mînaz ke semedê hemşaredarîya wextê verî yê Tuşbayî ameye weçînayîş la semedo ke mazbata nêdabî HDPyî, hemşaredarîya xo nêkerd, wina vat: “Qeyûm, polîtîkaya şerê taybetî rê zemîn awan keno. Hetêk ra destê aştîye yeno dergkerdiş, heto bîn ra zî qeyûm yeno tayînkerdiş. Tîya de nakokîyêk pîl est ê.”

 

Polîtîkayê qeyûmî 2016ine ra heta nika dewam kenê. Weçînayîşê 31ê Adare ser o 3 aşmî derbaz bîbî, 5ê hezîrane de qeyûm tayînê şaredarîya Colemêrgî ya DEM Partî kerdî, 31ê teşrîna verêne de tayînê Esenyurtî yê CHP û 4ê teşrîna peyêne de zî tayînê şaredarîya Mêrdîn, Êlih û Xelfetî kerdî. 22yê teşrîna peyêne de zî tayînê şaredarîya Dêrsim ê DEM Partî û Pulur de zî ê CHPyî rê kerdî.

 

Reaksîyonê hemverê qeyûmî dewam kenê. Ayşe Mînaz ke 2019ine de semedê şaredarîya Tuşbayî ameye weçînayîş la semedo ke mazbata nêdabî HDPyî, hemşaredarîya xo nêkerd, polîtîkayê qeyûmî ercna.

 

Ayşe Mînaz da zanayîş ke kurdan ser o tedayê cidî est ê û vat: “Qeyûman dir no zaf baş yeno vînayîş. Hîrê demî yo ke qeyûm yeno tayînkerdiş. Eynî îqtîdar, eynî netîce ra xelas nêbî. AKP wazeno ke welat demokratîkbîyayîş ra dûr bifîno û bikero zemînê nêqanûnî. Îradeyê şarî nas nêkeno. No qeyûm newe nîyo. Demêk derg o hemverê têgêrayîşê sîyasî yê kurdî no yeno ciwîyayîş. Qeyûman tayînê vera hevalanê ma kenê û sûcdariyê ke ca de nîyê kenê.”

 

‘Şexsê hemşaredaran de qeyûm tayînê pêro şaran rê yeno kerdiş’

 

Ayşe Mînaz dewam de wina vat: “Demê ewilî û diyîn de bi sebeb tayîn kerdêne. La badê cû nêeşkayî sebeban zî bidê vernî. Şewêke de derheqê hemşaredaran de cipersayîş yeno destpêkerdiş û qeyûman tayînê vera hevalanê ma kenê. Esasê xo de qeyûm şarî rê yeno tayînkerdiş.”

 

‘Bi qeyûman zemînê polîtîkaya şerê taybetî awan keno’

 

Ayşe Mînaz dîyar kerd qeyûm tayînê îradeyê cinîyan bîyo û wina vat: “Çi heyf qeyûm herême de polîtîkaya şerê taybetî rê zemîn awan keno. No zemîn mudaxaleyê wareyê cinîyan yê şaredarî de zî keno. Merkezê Cinîyan yê Cuye padanê. Stargehê cinîyan padanê. Îstasyonan padanê. Xebatê cinîyan yê şaredarîyan nêrehet kenê. Ver bi 25ê Teşrîna Peyêne de ma qeyûman munaqeşe kenê. Cinî hedef  yenê girewtiş. Wazenê cinîyan çin bikerê. La têkoşînê cinîyan esas o. Kes nêeşkeno nê muhakeme bikero.”