Sema Çaglak

 

SÊRT - Hemverfeka Partîya Çep a Keske ya Sêrtî Emîne Aşkaraye dîyar kerd ke xebata weçînayîşî ya Sêrtî bi coşêk gird dewam kena û wina vat: “Newroze de ciwanan rengê xo dîyar kerd. Weçînayîşî de zî rolê înan dîyar o. ma do bi serkêşîya cinî û ciwanan serbikewî.”

 

Kurdistan û Tirkîya de xebata weçînayîşî dewam kena. Partîya Çep a Keske zî Sêrtî de zend û bendanê xo tada û dew bi dewe, qeza bi qezaye û tax bi taxe xebata xo dewam kena. Kişta xebatan de coşê şarî zî hêzêk gird dano xebatkaran. 

 

Derheqê babete de Hemverfeka Partîya Çep a Keske ya bajarê Sêrtî Emîne Aşkaraye ajansê ma rê qisey kerd. 

 

‘Şarê ma xo rayra beno’

 

Emîneye dîyar kerd ke Partîya Çep a Keske heme şaran mîyanê xo de hewênena û wina vat: “Bi desan partîyê ma ameyî girewtiş la hertim herinda înan de ma partîyêke bîn awan kerd. Her çend ke hemverê sîyasetê kurdî de hêriş bêro kerdiş zî nêeşkenê xeta fikr û felsefeya partîye çinî bikerê. Şarê ma zî zano ke xo rayra bibo. Rengê ci zî Newroz û 8ê Adare de ame asayîş.”

 

‘Bawerî bi serkewtişî esta’

 

Emîne, dîyar kerd ke Sêrt de xebatê weçînayîşî bi coşêkê pîl bêmabên dewam keno û vat: “Sêrt de zî hetê weçînayîşî de atmosferêk germ esto. Ganî pêro kesî vîr û bawerîya xo bikero yew û bizano ke Partîya Çep a Keske nê îqtîdarî do bierşawa. Seba ke no weçînayîş bîyayîş û nêbîyayîşê ma yo. Her kes rolê xo kay keno û bawer ê ke serkewtiş yê ma bibo. Partîya Çep a Keske xo reyde vurnayîşê weşan bîyara. Hetê cinîyan ra vurnayîşê weşî bîyara. Hetê cinîyan ra têduştîyêk bîyaro. Seba ke eynî wextî de partîya ma partîya cinîyan a. Sewbîna hetê huqûq û edaletî de zî hêvî û idîayê ma estê.”

 

'Xebatê ma dewam kenê’ 

 

Emîne qiseykerdişê xo de wina bale ant serê xebatê weçînayîşî: "Netîceyê weçînayîşî akerdişê buroyan de xo dîyar kerd û heta nika ma 2 buroyê xo akerd û do no akerdişê buroyanê ma dewam bikerê. Sêrt de erebî, tirkî û kurdî pêro mîyanê yewbînan de yê. Pêwa bi serran o Sêrt de ma cuyêka têduşt ciwîyenê. La Sêrt de feqîrîyêk xeylêk pîl esto û şar binê krîzê ekonomî de ameyo pelçiqnayîş. Gama ke ma şarî reyde kom benê û waştişê înan goşdarî kenê, vernê de wazenê krîzê ekonomî çareser bibo û no îqtîdar şêro.”

 

‘Ciwanî xo bi rêxistin kenê’

 

Emîne, dîyar kerd ke reng û vengê ciwanan Sêrt de zî berz beno û wina vat: “Yê ke tewr zêde darbeyê giran wanê ciwan ê. Ciwan êdî ameyoxê nêvînenê û zehmetîyan ciwîyenê. Ameyoxê ciwanan ameyo çinkerdiş. Coka ciwanî nê weçînayîşî de rolêk dîyarker gênê. O vindertiş tewr zêde Newroz de ame asayîş. Ciwanî her ke şino xo bi rêxistin kenê. Bawerîya ma zî bi ciwanan esta û ma do bi rayberîya cinî û ciwanan serbikewê.” 

 

Emîne, qiseykerdişê xo wina qedêna: “Xebatê weçînayîşî ya Sêrtî bi hêz û coş derbaz beno. Bawerî Sêrtî ra esta. Ma hêvî kenê ke Partîya Çep a Keske cinî, ciwan û pêro bawerîyan rê biba cewab. No şar bi  serran o seba heqê xo bidest bikerê têkoşîn kenê. Vengdayîşê mi o yo ke pêro şarê Sêrtî yê erebî, kurdî û tirkî destê xo bidê destê yewbînan."