QERS - Qers de Partîya Çep a Keske bi namzedê cinî yê parlamenterîye reyde amadekarîya weçînayîşî kena.  Gulîstan Kiliç Koçyîgîte ke aye zî namzedan ra yew a bale ant serê muhîmîya temsîlkarîya seyyewbînanîye. Gulîstane da zanayîş ke ê do demê verênan de bi temsîlîyetê seyyewbînanîye xo weçînayîşî rê hadre kenê û vat: “Ma do pîya azad bibê.”

 

Seba Weçînayîşê Pêroyî yê Serekkomarîye û yê Prosesê 28ine yê Parlementerîye ke do 14ê Gulane de Kurdistan û Tirkîya de bêro kerdiş, partîyê sîyasî badê eşkerakerdişê beyannameye namzedan lez da xebata xo ya weçînayîşî. Lîsteya ke 600 kesî ra pê yena û AKP pêşkêşê Heyetê Berzî yê Weçînayîşî (YSK) kerd de tena 113 heb namzedê cinîye estê û ya MHPyî de zî tena 73 nemzedê cinîyî estê. Heto bîn de lîsteya namzedan ya CHPyî de zî tena 113 cinî esta. Partîya Çep a Keske mîyanê partîyan de 490 namzedê parlementerîye ra 193ê tenî cinî yê.

 

Cinîyê ke hemverê Tîfaqê Cumhurî de vanê nîmeyê komelî cinîyan ra pê yeno û nîmeyê weçînitoxan zî cinî ya, seba weçînayîşê 14ê Gulane ya ‘Tarîxî’ ya hemverê nêseyyewbînanîya cinsîyetî, seba newera destfînayîşê Peymana Stenbolî û caardişê Qanûnê 6284î xo hadre kenê ke welat rejîmê ‘Yew camêrdî’ ra bixelisnê.

 

Namzeda Parlamenterîye ya Qersî Gulîstan Kiliç Koçyîgîte derheqê weçînayîşê 14ê Gulane de ercnayîşan kerd.

 

Sebebê şîdetî: Polîtîkayê şer ê

 

Gulîstane dîyar kerd ke Tirkîya de şîdetê hemverê cinîye her ke şino gird beno, şîdet tesîrê xo serê heme raşteyê cuye de keno û wina vat: “Raştîya îqtîdarê AKPyî pelçiqnayîş, nuqtaya dîyarkerd ya nê şîdetî ya. Merheleya şîdetî ya herême, şerê Sûrîye yê kişta ma, operasyonê Tirkîya yê Başûrê Kurdistanî yo. Îqtîdar herinda ke problemê Kurdî bi raybazanê demokratîkan çareser bikera, polîtîkayê şerî xo rê esas gêno. Şîdet komel mîyan de zêde bîyo. Kişta ci de zemînê şîdetî yê Tirkîya bêcezaverdayîşê kesê ke şîdet bi cinîyan kenê, kêmkerdişê cezaya înan û feshkerdişê Peymana Stenbolî ra yeno.”

 

'Ma Peymana ÎLOye ya bi hûmara 190î muhîm vînenê’

 

Gulîstane ard ziwan ke şîdetê serê cinîye her raşteyê cuye ser de tesîr keno û bale ant peymana Rêxistina Kede ya Mîyanneteweyî (ILO) ya derheqê roşnkerdişê şîdetê mîyanê karî ser û wina dewam kerd: “Cuya xebatî de, mobîng û tacîzêk zaf giran esto. Ma na babete de Peymana ILO ya bi hûmara 190î ke şîdet û tacîzî gêno mîyanê xo muhîm vînenê. Ma baş zanê ke cinîye cuya xebate de timî merheleya diyîne de ya. Uca de timî tacîz bi înan yeno kerdiş, keda înan yena werdiş. Ma baş zanê ke Tirkîya peymana hûmara 190î ya ILOye îmza bikera, ganî seba caardişî nê tedbîran bigêra û huqûqê miyanenî ca bîyara. Çike xeylê cinîyî şîdeto ke serê karî de bi înan yeno kerdiş vera mecbur manenê ke xebete ra fek vera bidê. Coka ra zî xeylê raşteyê xebate, raşteyê xebate yê ke serdestîya camêrdî tede esto, ya zî pozîsyo ke camêrd bieşkî cinîye bindest bikerê û heqê xebate nîno qebulkerdiş de yê.”

 

'Amacê ma no yo ke cinî bi hawayêko seyyewbînan û azade bicuya’

 

Gulîstane dîyar kerd ke wexto ke dinya û Tirkîya de problemêk hetê karî de bibo, bêro waştiş ke tay kesî gure ra bêrî vetiş cinî yena hedefgirewtiş û gure ra yena eştiş. Gulîstane vat: “No şîdet cinîyan raşteyê xebera ra dûrî fîneno. Heta nika 18 welatî peymana ILO ya 190î tesdîq kerd û ganî Tirkîya na babete de gamêk bierza. Ma zanê ke xeylê rêxistinê meslekî yê kede zî na babete ser de xebetîyenê. Çi heyfo ke Wezîrîya Kar bi israr na babete de gamêk nêerzena. Hetê prosesê neweyî de ma eşkenê wina vajê; hem seba îmzekerdişê ILO 190î û hem zî seba Tirkîya biba hetgirê nê peymane ma do hem bi lez Peymana Stenbolî ca bîyarê, hem zî seba îmzekerdişê ILO 190î çi destê ma ra bêro ma do bikerê.”

 

'Wazenê probleme Kurdî çareserîye ra dûrî bifînê’

 

Sewbîna Gulîstane dîyar kerd ke no demêk dergo ke Tirkîya de şerêk taybet hetê hukmatî ra hemverê kurdan de yeno rayraberdiş û vat: “Dewleta ke çareserîya demokratîke ya probleme Kurdî ra dûrî kewta, wazena problem xorî bikera. Ma nuqta de ganî ma dîyar bikerî ke hedefê yewine yê şerê taybet cinî yo. Dewaya Îpek Er, Gulîstan Doku, Kezîban Kunt û xeylê hedîseyanê winasîyan ma dî. Yanî xeylê rewşan de ma vînenê ke şerê taybet wenî Kurdistan de bîyo sebebê wêrankerdişî û senî her çî kerdo hedef, cuya cinîyan zî tede. No tena bi Kurdistanî sînor nîyo. Ma vînenê ke metropolê Tirkîya de hemverê ciwan û cinîya kurde de polîtîkayê xeylê taybetî yenê rayraberdiş. Herinda ke problemê Kurdî bi raybazanê demokratîkan bêro çareserkerdiş û heqê cinîyan bêrî naskerdiş, ma bi îqtîdaro ke nê caardişanê teberêmerdimîye aver beno reyde rî bi rî yê.”

 

'Hemverê polîtîkayê şerê taybetî hişmendîyê cinîye girîng o'

 

Gulîstane, bale ant serê hişmendîyê sîyasî û hişmendîyê cinîyan ê hemverê polîtîkayê şerê taybetî û wina vat: "Naskerdişê cinî yê şarê xo û nasnameyê xo û erjê xo do vindertişê aye ya hemverê şerê taybetî zelal bikero. Na mana de lazimîya ma bi nêzdîbîyayîşêk ke komelî bi erjê xo yê bingehîn bîyaro têhet û cinî serê xeta azadîya cinî de biciwîyo esto. Eke cinî erjê xo yê azadîye nas bikero û eke ma bieşkê înan bîyarê têhet, o wext tu malzemeyê şerê taybetî do sernêkewo. Ganî perwerdeyê seyyewbînîyeya cinsî pêro mekteban de bêro dayîş û her ca de  bêro hîrakerdiş û seke perwerdeyê bingehîn bêro qebûlkerdiş.  Xêrcê nê, lazimîya ma bi xetêke têkoşînî ya xeylêk hempar esto ke ma bi cinîyanê taxe reyde bêrê têhet û îdeolojîyê azadîya cinîyan înan rê vajê."

 

'Plansazgehê bajarê ke cinî wayîr vejîyê lazim o'

 

Gulîstane, dîyar kerd ke nêbîyayîşê roşnî bi taybetî park û kuçeyanê bajarî de beno sebeb ke cinî xo tîya de asayîş hîs nêkerê. Gulîstane dîyar kerd ke ganî Partiya Çep a Keske ameyox de bajaran bi nê rengî dîzayn bikero ke cinî, tut, kal û pîrî demê bêro de xo asayîş hîs bikerê û vat: "Rastîyê projeyê vurnayîşî yê  îqtîdarî pawitişê berjewendîyan o ke do cuya taxan zor bero, cuya qetî nînan tesdîqkerdiş. Ganî plansazîyê bajarbîyayîşêk ke cinî her wextî de heta dimayê nîmeyê şanî bieşkê xo ci de asayîş hîs bikerê, bêrê kerdiş..."

 

Partîya Çep a Keske wayîrê temsîlkarîya tewr zêde ê cinîyan a

 

Gulîstane, serê dayeyê temsîlîyetê cinîyan ê lîsteyê partîyê sîyasî de, dîyar kerd ke Partîya Çep a Keske bi dayeyê sera 45 partîya ke tewr zêde temsîlkarîyê cinîyan kena ya. Gulîstane wina vat: “Helbet demê bêro de ma do bi nê  temsîlîyetê têduşt pê bîyarê. Ganî no sey nîşaneyê têkoşînê ma yê azadîya cinî û cayê cinî mîyanê sîyaset de bêro vînayîş."

 

'Ma do pîya azad bibê!'

 

Gulîstane, venga cinîyan kerd ke ganî demê weçînayîşî yê tarîxî de seba pawitişê heq, cuya xo, Peymana Stenbolî, hemserekîye û temsîlîyetê seyyewbînîye de hîsgêr bê û vat, “Ez venga pêro cinîyan kena ke verê ma de bibê û têkoşînê ma pîl bikerê. Ma do pîa bişuxulîyê û ma do pîya azad bibê. Ma do pîya serbikewê."