Dîlan Babat 

 

HATAY - Namzeda Partîya Çep a Keske a Hatayî ke rêza diyîne de ya, Şîrîn Nur Vurale da zanayîş ke her nasnameyê cîya binê sîwanê Partîya Çep a Keske de ca gêno û vat ke seba keda cinîyan bêra dîyîş do têkoşîn bikera.

 

Weçînayîşê serekkomarî û parlementerîye rê demêk kilm mend û Partîya Çep a Keske bêmaben xebata xo rayra bena. Partîya Çep a Keske 600 namzedan ra ca daye 264 namzedanê cinîyan. Namzeda rêza diyîne ya Hatayî Şîrîn Nur Vurale ya. Şîrîne Antakya ra ya û mexdurê erdlerzî ya.

 

Şîrîn Nur Vural kam a? 

 

Şîrîne serra 1982î de Serînyolê Hatayî de ameya dinya. Çar way û bira yê. Şîrîne dîyar kerd ke pîyê aye Arabîstan de xebetîyeno û pîyê xo ra dûrî pîl bîya. Şîrîne wina vat: “Mi datê xo rê vatêne bawo. Dayîka mi hem bî dayîk hem zî bî mamosteya ma. Ez tena kênaya û hirê birayê mi estê. Mi sere çewt nêkerdêne. Tutîya xo de zî vera sîstemo serdest yê camêrdî de vindertêne. Mi o wext tedaya komelî yê serê cinîyan fehm kerd. Wexto ke pîyê mi ameyêne keye nêwaştêne ke ez badê birayanê xo bêra keye. Mi Mektebê Berzî yê Mamostayîya Bedenî ya Kocaelî qezenc kerd. Pîyê mi bawerîya ci bi mi estbî. La timî cuye de nakokî estbî.”

 

‘Nasnameyê cîya kişta yewbînan de yê’

 

Şîrîne wina dewam kerd: “Serra 2004î de ez şîya unîversîte. Mi têkoşînê cinîye şinasna. Ez mezun bîya. Mi û embazî ma pîya Paştîdayîşê Komelî yê Serînyolî awan kerd. Ez bîya endama ci ra awankerdoxe. Mi demêk serektî kerd. Mi festîvalan de pêşkêşwanîye kerd. Mi kolektîfê keda cinîyan û kampê cinîyan de ca girewt. Mi nê mercîyan de xo asan hîs kerdêne. Ma timî mîyanê yewbînan de û kêfweşîye de bî. Coka ra zî mi verê xo da Partîya Çep a Keske. Partîya Çep a Keske nasnameyê cîyayan mîyanê xo de hewênena.”

 

‘Ma do seba Peyamana Stenbolî têkoşîn bikerê’

 

Şîrîne da zanayîş ke projeyê derheqê cinîyan do bi Partîya Çep a Keske reyde bikerê cuye û domna: “Tesilî do çîyê weş bêrî kerdiş. Seba Peymana Stenbolî bikewa cuye ma do têkoşîn bikerê. Sey cinîyêk ke dayîka hirê tutan a ez do seba dîyîşê keda cinîye têkoşîn bikera. Seba seyyewbînanîye seba meaşo seyyewbînan Partîya Çep a Keske de bîya namzed. Erdlerzî ra dima şarê Antakya terkê qederê xo ame kerdiş. Qet hetkarî nêame kerdiş. Ma do seba cinîyan raşteyê asayî awan bikerê.”

 

‘Ma soz danê’ 

 

Şîrîne peynîya qiseykerdişê xo de dîyar kerd ke verê ke tarîxê Antakya nêxerepîyo do bikewê prosesê awankerdişî mîyan û wina peynî ard: “Ma soz danê ke do her kes herra xo ser de goreyê xo awanîyan virazo û vînîkerdişê ekonomîye bi lez bêro çareserkerdiş. Ma sey Partîya Çep a Keske û Meclîsê Cinîyan do kişta şarê xo de bê.”