ANQARA - HDP û Partîya Çep a Keske mesajê roşanî weşana û vatî: “Ma eşkenê 14ê Gulane de na herra ke ma ser de yî seba şarê xo biaçarîyp roşanê daîmî.”

 

Partîya Demokratîke ya Şaran (HDP) û Partîya Çep a Keske mesajê Roşanê Remezanî weşana. Wirdî partîyî roşanê şarî pîroz kerd û bale antî weçînayîşo ke do 14ê Gulane de pê bêro viraştene ser.

 

'Hetêk ma şîno bêpeynî, hetêk ma wisar û baxçe’

 

Mesaj de wina ame vatiş: “Ma nê roşanî bi dej û hêvîye pêşwazî kenî. Ma kesê ke erdlerzî de dinyaya xo bedilnayî bi hesret vîr anî. Bi sozo ke ma dayo înan ganî ma bedilnayîşêk raşt pê bîyarî. Nika wextê verikkerdişê yewbînan o. Ma do birînanê xo pîya bipişnî û ma do hêvîye, bextewarîye pîya gird bikerî. Ma eşkenê 14ê Gulane de na herra ke ma ser de yî seba şarê xo biaçarnî roşananê daîmîyan.”