STENBOL - Namzedê Partîya Çep a Keske û endamê partîye yê Taksîmî wexto ke vilawekan vila kerdêne xeylê reyan hetê polîsan ra ameyî astengkerdiş.

 

Koma ke namzedê parlementerîye yê Partîya Çep a Keske Cengîz Çîçek, Ozturk Turkdogan, Ozgur Sakî û Nîlay Kuşe mîyan de bî, waşte ke Rayîrê Îstîklalî yê Taksîmî yê Stenbolî de vilawekan vila bikera.

 

Koma ke vilawek vila kerdêne xeylê reyan hetê polîsan ra ameye astengkerdiş. Polîsî seba ke kome bikera di parçe, otobus derbaz kerd. Vera astengî û hêrişan kome rayraşîyayîşê xo domna.

 

Serê nameyê koma ke ameye raşteyê Taksîmî Ozturk Turkdoganî qisey kerd û dîyar kerd ke xebatê înan ê weçînayîşî yenê astengkerdiş û bi no hawa heqê propagandaye yeno astengkerdiş.

 

Badê qiseykerdişî kome şî xeymeyê Partîya Çep a Keske ke Taksîm de ameyo ronayîş.