STENBOL - Tepişteya nêweşa girane ya PKKyîje Gulistan Abdo ke 1994ine de birîndar ameye girewtiş û seba nêameye dermankerdiş, çokê aye yê çepe ame tirakerdiş, mecbûr mende bi platîn biciwîya.  Gulîstane ke 29 serrî yo tepişte ya, nîna veradayîş. Yewin waştişê Gulistane tehlîyekerdiş o.

 

Tepişteya PKKyîje ya nêweşe Gulistan Abdo Efrîn de ameye û 1994ine de Mehsertê Mêrdînî de bi birîndarî sûcdarîya ‘endamîya rêxistine’ ameye tepiştiş. Çokê aye yê çepe seba birînê kangrenî bî û ameye tirakerdiş û protez kerdê ci. Gulîstane zîndanê Amed, Sêwas û Sêrtî de tepişte mende. 12 serrî verê surgunê zîndanê Tîpê Myê Gebzeyî ameye kerdiş.  Protezê Gulîstane 2010ine de ame vurnayîş. Protezê ke ganî her tim bêro newekerdiş bi serran o nîno vurnayîş.

 

Sereyê aye şikite nêame dermankerdiş

 

Gulistane problemê pîlî ciwîyena, nêeşkena tena wurzo û roşo. Gulîstane 2020î de kewena û sereyê aye şikino. Pêwa nê nêameye dermankerdiş. Gulîstana ke ganî biameyîne dermankerdiş, kontrolê aye zî bi sebebê cîya yenê astengkerdiş. 

 

Mektube de îhlalkerdişan qalî kena 

 

Gulistane 2019ine de mektube şirawete Komeleya Heqê Merdiman (ÎHD) ya Stenbolî û vat, pêwa astengdarîya aye bi kelepçeyî benê nêweşxane, bi wesayîtê rîngê benê û no zî şert û mercê şîyayîşê nêweşxaneyî zehmet keno. Gulîstana ke nêweşa hîpertansiyon a û rehmê ci de kîst esto, 2021î de bi kovîd kewena.

 

Nîna tehlîyekerdiş û dermankerdiş! 

 

Gulistane ‘listeyê nêweşê giran’ ê ÎHDyî de manena û 29 serrî yo tepişte ya. Komîsyonê Zîndanan û ÎHDyî seba Gulistane her hewte ‘roniştişê F’ pê ard û venga wezaretê dade û tipê Edlî kerdî ke ganî bêra tehlîyekerdiş. La çi heyf ne yena tehlîyekerdiş ne zî yena dermankerdiş.

 

Fek xoverdayîş ra vera nêda

 

Keyeyê Gulistane seba şerî Haleb ra koçê Swîsre kerdo. Bi serran o tenê bi telefon keyeyê xo reyde pêvînayîş kena. Gulistane bi dayîka xo ya ke Swîsreyî de ya qisey kena la bi wayê û birayanê xo yê Heleb û Tirkîya bi sebebê heqê xo pirr kerda nêeşkena qisey bikera. Gulistane pêwa pêro nêweşîyanê xo zîndan de fek xoverdayîş ra vera nêdana.

 

Dewayê ke yenê akerdiş yenê nimitiş

 

Avûkata Gulistane ke 18ê Nîsane de pêvînayîş ci reyde kerdibi wina vat: “Tu weşanê çapemenîye nêgînê zîndan. Weşanê muxalîf nêdanê. Her roje kitaban kêm kenê. Gulistane wazena demo ke bêro veradayîş şêro verê dayîka xo ya Swîsreyî. Wazena nê heqî ra feyde bigîro. Gulistane rê di dewa ameyê akerdiş la ma muhtewayê ci nêzanê. Ma cigêrayîş kenê.”