Dîlan Babat

 

MEREŞ – Namzeda tewr ciwane ya Partîya Çep a Keske Ayşegul Demîrogluye qala amacê namzedîya xo ya ke Partîya Çep a Keske ra bî namzede kerd û dîyar kerd ke aye wazena raşteyê averberdişê vatiş, veng û azadîya ciwanan awan bikera.

 

Weçînayîşo ke do 14ê Gulane de pê bêro rê demêk kilm mend. Cayê ke tewr zêde erdlerzê Mereşî ra tesîr bî ra yew zî qezaya Bazarcixî ya Mereşî bî. Bazarcix de nika şar xo hadre keno ke şêro sindoqan ser. Partîya Çep a Keske ke Mereş de xebata xo bêmaben dewam kena de hedefe înan no yo ke Mereş de parlementer bivejnê.  

 

Namzeda tewr ciwane ya Partîya Çep a Keske Ayşegul Demîrogluye ajansê ma rê qala sebebê namzedîya xo ya Partîya Çep a Keske kerd.

 

Xo seba huqûqî hadre kena 

 

Ayşegule serra 2004î de qezaya Bazarcixî ya Mereşî de ameya dinya. Daye û pîyê aye kedkar ê. Hirê way ê û aye waya diyîne ya. Mektebê sereyine û orte Bazarcixî de wanda û mektebê amadekarîye zî Dîlok de qedênaye. Nika xo seba unîversîteye hadre kena. Ayşegule dîyar kerd ke vera bêhuqûqîyan do beşe huqûqî biwana.

 

‘Wazena biba vengê ciwanan’ 

 

Ayşegule dîyar kerd ke sey cinîyêka ciwan û Kurde hema emrê xo yê şenikîye de keyeyê aye mîyanê têkoşînî de bî û aye her tim raşteyan de bîya û wina vat: “Tewr baş Partîya Çep a Keske mi fehm kerd. Vera kiştişê cinîyan, vera sîstemê perwerdeyî yê têkşîyaye de Partîya Çep a Keske vengêk baş û îfadekerdiş a. Ma bobelatêk gird cuyayî. Erdlerzî de xeylê kesî dinyaya xo bedilna. Ez wazena ke biba vengê înan zî. Seba ke no sîstem û zîhnîyet şêro ez do têkoşîn bikera.”

 

‘Ma wazenê raşteyê azad awan bikerê’ 

 

Ayşegule dîyar kerd ke Tirkîya de seba ciwanan raşteyê cuye nêverdayê û wina dewam kerd: “Vernîya erdlerzî zî îmkanê ciwanan çinîbî. Bi krîzî reyde tewr zêde rewşe xira bî. Ma seba îmtîhanan serranê xo danê. La hewldaşî ma bêheq maneno. Tirkîya de rewşe wina ya. Ma Tirkîya de ber bi ber kar gêrenê. Ma marketan de kar vînenê. Ma wazenê peynîya nê bîyarê.”

 

‘Ez wazena biba vengê embazanê xo yê ke merdî’

 

Ayşegule dewamê qiseykerdişê xo de wina vat: “Hemverê kiştişê cinîyan ê Tirkîya îtîrazê cinîyanê ciwanan esto. No welat de bi rehetî desteştiş û şîdet cinîyan rê yeno kerdiş. kuçeyan de cinîyî bi rehetî yenê qetilkerdiş. Kiştoxî yenê veradayîş. Betalî Tirkîya de zaf zêde ya. Bi xususî betaliya cinîyan zaf zêde ya. Peymana Stenbolî şewêke de ameye wedaritiş. Nika zî wazenê qanûnê 6284ine wedarnê. Ma wazenê nê qanûnî bipawê. Erdlerz de xeylêk embazê min ê seba îmtîhanê xo amade kerdêne, dinyaya xo bedelnayî.  Ez wazena biba vengê embazanê xo yê ke dinyaya xo bedelnayî. Yê ke komelî serê lingan de verdenê ciwan ê. Prosesê awankerdişî de rolo pîl serê ciwanan de yo. Ma hêzê esas ê komelî yê. Ma heme ciwanî zanê ke hêvî zî ma yê û ameyox zî ma yê. Do ciwanî peynîya nê binpaykerdişî bîyarê.”