Melek Avci

 

ANQARA - Namzeda Herêma 2yine ya Anqaraye ya Partîya Çep a Keske Sîma Arîye dîyar kerd ke sey ciwan û cinîyêk do vermuhakemeyan bişiknî û ganî vera neheqîyan û tedayan de vinderî.

 

Weçînayîşo ke do 14ê Gulana 2023î de pê bêro rê 20 roje mend û Partîya Çep a Keske her ca de xebata weçînayîşî rayra bena. Bado ke beyannatê weçînayîşî ame eşkerakerdiş û pêro partîyî namzedanê xo eşkera kerd, namzedi vejîyayî raşte. Namzedî şarî reyde yenê tê het û persê ‘rayîro hirîne û Partîya Çep a Keske’ şarî rê pers kenî. 

 

Temsîlkarîya ciwanan a Partîya Çep a Keske de 

Partîya Çep a Keske ke lîsteya xo de zêde ca daye cinîyan, sey partîyêk ke muhîmî dana temsîlkarîya ciwanan bale ancena. Namzedê cinîye yê Partîya Çep a Keske ra yew zî Sîma Arîya ciwan a. Sîmaye herêma diyîne ya Anqaraye de ameya mojnayîş. Sîma Arî bi eslê xo Wanî ra ya û beşê Bernameya Kompîturî ya Unîversîteya Ispartaye qedêna û 23 serrî ya. Sîmaye dîyar kerd ke do bi Partîya Çep a Keske reyde vermuhakemeyanê hemverê cinî û ciwanan bişiknî.

 

‘Ganî ma vengê xo bidî eşnawitiş’

 

Sîmaye ard ziwan ke sey Kurdêk roja ke ameya dinya ra nata mîyanê têkoşînî de ca gêna û wina dewam kerd: “Seba ke ma vengê xo hîna baş bidî eşnawitiş ma binê banê Partîya Çep a Keske de ameyî têkişt. Sey Kurdêk her tim mîyanê her çîyî de bîya. Bado ke merdim pîl beno merdim fehm keno ke ganî nê çîyî bibî sîyasetî. Ganî merdim vengê xo baş bido eşnawitiş. Coka ra Partîya Çep a Keske de ya. Daye û pîyê mi her tim HDPyî de bî. Daye û pîyê mi paştîdayîşêk gird danî mi.”

 

‘Ma rayîrêk zehmetin de yî la ma do ser bikewî’

 

Sîmaye da zanayîş ke do xo bi şarî bidî qebulkerdiş û wina dewam kerd: “Xebatan de şar eleqeyêk gird mojneno. Ez na bawerîye de ya ke ma do xo bi her kesî bidî qebulkerdiş. Ez bawer kena ke do ma fehm bikerî. Ma rayîrêk zehmetin de yî la ma do bi ser bikewî. Ma hetê enerjiye de xeylê baş î. Ez bawer kena ke ma do bi Partîya Çep a Keske reyde ser bikewî.” 

 

Qey ganî ciwan Partîya Çep a Keske de ca bigêrî?

 

Sîmaye qiseykerdişê xo wina domna: “Badê namzedîye, mi xo tîya de qet xerîb hîs nêkerd. Partî her tim paştîdayîş da cinî û ciwanan. Qey ganî ciwan Partîya Çep a Keske de ca bigêrî? Tîya de nêseyyewbînanîye çinî yo. Ez xo sey cinîyêk aîdê tîya hîs nêkena. Ez her kesî dawetê partîye kena. Wa bêrî ma nas bikerî. Hedefê ma no yo ke perwerdeyî bi ziwanê dayîke bêro dayîş. Ma bi nê bawer kenî û pawenî.” 

 

Sîmaye ard ziwan ke weçînayîşê 14ê Gulane xeylê muhîm o û wina peynî ard: “Ganî cinî kişta Partîya Çep a Keske de ca bigêrî. Ganî ma peynîya nê sîstemê serdestî bîyarî. Ma do vermuhakemeyan bişiknî. Ma azad bibî û her kesî azad bikerî. Cinîye bi serran o yena binpaykerdiş. Ganî ma nê neheqîyan rê vajî êdî bes o. Partîya Çep a Keske de cinîyî wayîrê rêjeya se ra 45e ya. Ma do rejîmê yewcamêrdî rê vajî nê.”