RIHA - Namzeda Partîya Çep a Keske ya Rihaye Dîlan Kunt Ayane dîyar kerd ke netîceyê weçînayîşî yê Riha do Tirkîya rê şekil bido û bale ant rihê xoverdayîşî yê bajarî ser û vat: “Hêzêk ke paradîgmaya ma ya azadîya cinîye zelal roneno raşte esto. Ya ke paştîdayîş dano nê çîyî zî Partîya Çep a Keske ya.” 

 

Weçînayîşo ke do 14ê Gulane de pê bêro rê wextêk kilm mend. Namzedê Partîya Çep a Keske bêmaben xebata xo rayra benê. Rihaye de zî xebate bêmaben dewam kena û nemzeda Partîya Çep a Keske ya Rihaye Dîlan Kunt Ayane derheqê atmosfer û asayîşê weçînayîşî de qisey kerd.

 

Muhîmîya rayîrê hîrêne

 

Dîlane da zanayîş ke Komara Tirkîye kewta seserra diyîne û seba awankerdişê cuyêka newe rayîrê hîrêne xeylê muhîm o. Dîlane wina dewam kerd: “Ma wazenê ke polîtîkayê seserra ewilîne de hemverê cinîyan ameya rayraberdiş û bêçareserîya probleme kurdî qedênenê, wextê faşîzmî birijnê. Amacê ma awankerdişê cuyêka newe yo. Riha zerrîya Mezopotamya ya. Amacê ma no yo ke yewîya mabenê eşîran de awan bikerê.”

 

Partîya cinî 

 

Dîlane bale ant problemê esasî yê komelî ser û wina domna: “Cinî bi destê sîstemî hepsê keyeyî ameyî kerdiş. Îqtîdar wazeno profîlê cinîya goreyê xo awan bikero. Ma sey partîya cinîye hemverê nê de yê. Ma nêwazenê cinî tena bi dayîkbîyayîşî bêra zanayîş. Seba nê ma wazenê rol û mîsyono ke cinîye ameyo ferzkerdiş bêro rijnayîş.”

 

‘Ma do seba dayîka Emîne veng bidê' 

 

Dîlane bale ant têkoşînê edaletî yê Emîne Şenyaşare ser û vat Emîneye tena Riha de nê Tirkîye de bî sembol û wina dewam kerd: “Dayika Emîne vera heme zextan, destbendkerdiş, şertê hewayî dest têkoşînê xo ra vera nêda. Wezîrê Edaletî zî Riha de namzed ameyo mojnayîş. Ma şarê Rihaye ra berpirsîyar ê: Bi raştî şima wazenê edalet pê bêro? Cinî vanê ‘Ma seba Dayika Emîneye vengê xo danê Partîya Çep a Keske’. Ma nê vatişan zaf eşnawenê. Emîne Şenyaşare seba xeylê cinîyan bî çimeyê îlhamî. Sey dayîka Emîneye bi seyan cinîyî estê. Coka ra paştîdayîşê seba Emîne Şenyaşare xeylê muhîm o.”

 

‘Ters çinî bîyo’

 

Dîlane dîyar kerd ke Riha de rihê xoverdayîşî esto û wina vat: “Hêzêk ke paradîgmaya ma ya azadîya cinîye zelal roneno raşte esto. Vera zîhnîyetê camêrdî vindertişêk zala yê cinîyan esto. Ya ke paştîdayîş dano nê çîyî zî Partîya Çep a Keske ya. Ez deme verêne de koordînatorîya weçînayîşê Rihaye de xebitîyaya. Xeylê gonî rijîya. Xeylê pêrodayîş virazîya. La ma wazenê nê weçînayîşî de îradeya şarî sindoqan ra bivejîyo. Ma nêwazenê zirar bireso muşahîdan, wezîfedaran.”

 

Dîlan Kunt Ayane kam a?

 

Dîlan Kunt Ayane 1989î de qezaya Wêranşarî ya Rihaye de ameya dinya. Fakulteya Huqûqî ya Unîversîteya Kultur a Stenbolî ra mezun bîya. Demêk Riha de avûkatî kerd. Hemserekatîya Komelaya Huqûqnasê Mezopotamya ya Rihaye kerd. Komîsyonê Heqanê Merdiman a Baroyê Rihaye de,  Komeleya Paştîdayîşê Cinîyan a Keyeyê Cinîyan de xebat rayra berda. 2016î ra dima Wan de avûkatî kerd. Endamtîya Merkezê Pêroyî ya Komeleya Huqûqnasê Seba Azadîye (OHD) kerd. Serekîya Komeleya Heqanê Merdiman a Wanî kerd. Xebatê cinîyan de ca girewta. 2021î ra tepîya zî serekîya Komeleya Cinîyan a Starî ya Wanî kerd. Endamîya heyetê rayîrberîya baroyê Wanî kerd û endama Heyetê Rayîrberîya Komîsyonê Heqanê Cinîyan a Baroyê Wanî kerd. Nika zî namzeda Partîya Çep a Keske ya Rihaye ya.