Dîlan Babat

 

MELETÎ - Dewa Topraktepe ke xeylê xo nifûsê kurd û elewî ci de ciwîyenê, roja erdlerz virazîyayo, hema hetkarî nêşîya dewe. Cinîyan dîyar kerdî ke do 14ê Gulane de cewabê lazimî bidê.

 

Serê erdlerzê Mereşî ra 3 aşmî derbaz bî. Yew bajarê ke tesîrêk pîl ci de viraziyabi Meletî bî. Rêçê erdlerzî hema dewanê Meletî de estê. Kar û barê wedaritişê xirbeyan hîna nêqedîyayê. Dewa Topraktepe ya Meletî de rewşe hema sey xo ya û cinî dîyar kenê ke seba dewe kurd û elewîyan a tu hetkarî seba înan nêşîya.

 

‘Ma venga hukmatî kerd nêame'

 

Zelîha Taşer da zanayîş ke demê ewilî yê erdlerzî de zaf zehmet bîyo û vat: "Ma venga hukmatî kerd nêame. Cîranê ma veşayî û dinyaya xo bedelnayî. Ma hîrê rojî vêşan û têşan mendî. Vîşêrê şarî tu kes nêame. Ma zî dewe ra vejîyayî. Bi 5 rojî yo ma ameyî. Ma Stenbol de bî. Kone dayî ma. 6 kesî konêke de manenê."

 

‘Ez raya xo dana HDPyî’

 

Zelîhaye bale ant serê weçînayîşî û dîyar kerd ke do 14ê gulane de raya xo bidê xo û wina vat: "Şarê ma vajo çi ma wina kenê. Ma yewbînan ra nêvisênê. Ma raya xo danê partîya xo HDPyî. HDP wayîrê ma vejîya. Seba HDP qezenc bikero, çi destê ma ra bêro ma do bikerê."

 

‘HDP çinbîne ma do bimerdêne'

 

Fatma Esen zî da zanayîş ke weçînayîşê serekkomarî de do raya xo bidê Kemal Kiliçdagorlgu yê parlamenterî zî bidê Partîya Çep a Keske û wina vat: “Seba ke ma kurd û elewî bî, Tayyîp nêewnîya. Qet nêbo wa yê ma qezenc bikerê. Wa hetkarî bidê ma. Dewa ma rijya. Tu hetkarî nêameye. Seba dewa elewî bî tu kesî hetkarî nêda. Eke HDP çinbîne do elewî bimerdêne. HDPyî ra vanê terorîst ê. La ê terorîst ê.” 

 

‘Xêrcê rayanê ma tu çîyêk ma nêmendo'

 

Cinîya bi nameyê Hanim Bakay zî dîyar kerd ke demê erdlerzê Elbîstanî bîyo û wina vat: "Ma  serd de bi rojan teber de mendî. Ma pawit ke kesêk bêro. La dewlete ra  tu hetkarî nêame. Şar ame hetkarîya ma. Ez raya xo dana HDPyî. Xêrcê raya ma çîyêk ma nêmend. Ma do raya xo bidê  HDPyî.” 

 

Hatun Bakir zî dîyar kerd ke pêro merdimanê xo vînî kerda û wina vat: "Ma seba hetkarî veng dayîne kes nêameyîne. Tu kes nêame dewe. Kesî hetkarî nêda. Nika ez nika raya xo dana partiya Demîrtaşî. Seba reyke bîn kes nê çîyan nêciwîyo, ez raya xo dana HDPyî."