Dîlan Babat

 

MEREŞ - Cinîyê mexdurê erdlerzî yê Bazarcixî dîyar kerdî ke prosesê erdlerzî de kurdî ameyî hetkarîya înan û vatî ke do 14ê Gulane de raya xo bidê Partîya Çep a Keske.

 

Şarê Tirkîya û Kurdistanî xo hadre keno ke 14ê Gulane de şêro sindoqan ser. Cinîyê ke 21 serrî yo polîtîkaya îqtîdarî ra tesîr benê do derheqê cuya xo de qerar bidê. Erdlerzî de şar terkê mergî ame kerdiş û ame mexdurkerdiş. Bazarcix de cinîyan dîyar kerd ke do 14ê Gulane de hesab îqtîdarî ra bipersî.

 

‘Seba ke ma kurd û elewî yê ma kewtî na rewşe’

 

Dîlek Gezere da zanayîş ke roja erdlerzî ra heta nika dewlete tu hetkarî nêdaya înan û vat ke hetkarî hetêk de serweşî zî înan rê nêameyo waştiş û wina dewam kerd: “Hende kes merdî û hema xeylê kesî merdeyanê xo daxî nêdîyo. Yê ke merdî xora merdî la yê vînîbîyayeyan ra hema zî tu xeberêke çin a. Çend rojan verê cû firtone rawuşt û xeylê kesî birîndar bî û dinyaya xo bedilnayî. Reyna zî ma çîyêk baş nêdî. Şar zehmetî anceno. Bi hetkarîyanê şarî ma cuya xo domnenê. Hetkarîya şarî yena astengkerdiş. Ma her tim dewlete ra zirar dî. Seba ke ma kurd û elewî yê wina kerdî. Vanê ke wa kurd û elewîyî bimirê.”

 

‘Partîya Çep a Keske nêbayêne ma do vêşanîye ra bimerdêne’

 

Dîleke qiseykerdişê xo wina domnaye: “Yê ke hetkarî da şarî ameyî destbendkerdiş û tepiştiş. Dormeyê konbajar û xeymeyan de têl ame piştiş. Seke merdiman bikerê zîndan. Hema şima têl ant la qet nêbo hetkarîya şarî bikerêne. Dewlete ma heme kesan kerd dişmenê xo. Ma do 14ê Gulane de şêrê sindoqan ser û raya xo bidê Partîya Çep a Keske. Partîya Çep a Keske nêbayêne ma do vêşanîye ra bimerdêne.”

 

'Ez o raya xo nêdî Erdoganî'

 

Erdlerzeyan ra Zeynep Signak zî dîyar kerd ke erdlerz de bi rojan teber de mendê û wina vat: "Ma dewlete ra hetkarîyêk nêgirewt. Hema ma erdlerz serê xo ra nêeştibi, firtone rawuşt. Ma reyke bîn mexdur bî. xeymê ma perayî. Kurdî ameyî hetkarîya ma. Ez 14ê Gulane de raya xo nêdana Erdoganî. Ez raya xo dana Partîya Çep a Keske.”

 

‘Ez raya xo dana dare’

 

Îsaf Sari zî da zanayîş ke Hatay de torn û veyva xo vînî kerda û aye zî wina vat: "Veyve û tornê mi dimayê 14 rojî yê erdlerzî ameyî vetiş. Veyva mi ciwane bî. Ez tornê xo rê mird nêbîya. Dewlete tu hetkarî nêda. xeyêke dayî. Aye zî veng bî. Ne nîvînêk ne zî çîyêk. Ez o xeyma veng de senî bimana? Hatay de hîrê cenazeyê ma estbî. Mi girewtî û ardî. Ez 14ê Gulane de raya xo dana HDPyî. Ez raya xo dana dare.”