Gulîstan Dursun

 

DÎLOK - Weçînayîşî rê demêk tay mend û xebatê partîyê sîyasî bêmaben dewam kenê. Hemwelatijî dîyar kenê ke ê vera polîtîkaya AKPyî de Partîya Çep a Keske tercîh kenê.

 

Weçînayîşî rê demêk tay mend û xebatê partîyê sîyasî bêmaben dewam kenê. Partîya Çep a Keske tax bi taxe xebata weçînayîşî rayra bena û eleqeyêk gird mojnena. Ma atmosfere weçînayîşî û xebata Partîya Çep a Keske sîyasetmedar û hemwelatijan ra persayî.

 

Karneya AKPyî ya cinîye

 

Namzeda Partîya Çep a Keske ya Dîlokî Aysîma Mîhrîban Mehtap Aslane da zanayîş ke seba vengê bindest û ciwanan bibê meclîsî aye bîya namzed û bale ant serê zextê ke wextê AKPyî de ameyî ciwîyayîş û vat: “Şarê Kurd û Tirk êdî nê polîtîkayan nêwazeno. Ma ciwanî wazenê ke xo bi hawayêko azade îfade bikerê. Demê AKPyî de bi hezaran cinîyî ameyî qetilkerdiş. Peymana Stenbolî fesh kerdî. Qanûnê hûmara 6284î ca nêardî. Binê sîwanê Partîya Çep a Keske de heme şar bîyo yew. Ma do bi nê têkoşînê yewbîyaye îqtîdarî birişnê. Karê ma badê kewtişê îqtîdarî dest pêkeno. Ganî ma welat hetê komelî, ekonomî û sosyolojîkî de wedarnê payan ser. Hedefê ma Dîlok de no yo ke tewr tay ma hirê parlamenteran bivejnê. Ez veng kena ke rayan bidê Partîya Çep a Keske.” 

 

‘Ma do cuya newe pîya awan bikerê’

 

Endama Partîya Sosyalîste ya Bindestan (ESP) Satîye Oke zî ercnayîşê xo wina ard ziwan ser: “AKP erdlerzî de vînî kerd. Yê ke binê xirban de mend şar nêbê. AKP-MHP bî. Weçînayîş seba şarî zaf muhîm o. No weçînayîş do bibo weçînayîşo ke zextan rê bivajîyo êdî bes o. yewine rayîrê vera betalî û feqîrî no yo ke ma dormeyê Partîya Çep a Keske de bibê xeleke. AKP-MHP seba şaro kedkar û karkerî tu çîyêk nêkerdo. La yê ke rayîrê hirêne yê seyyewbînanîye esas gênê estê. Ez veng dana her kesî ke bi Partîya Çep a Keske reyde cuya newe pîya awan bikerê.”

 

Vengdayîşê wayîrvejîyayîşê rayan

 

Dayîka aştiye Habat Gengec dîyar kerd ke hemverê îqtîdarî de yewîye zaf muhîm a û vat, êdî wa tu kes nêterso û dest bido yewbînan, êdî zulm nêwazenê.

 

Fehîme Aslan zî dîyar kerd ke do netîceyê têkoşînê de destkewtişî zêde bibê û vat: “Bi 24 serrî yo ma Dîlok de şuxulênê. Ma do serbikewê. Ma do Selahattîn Demîrtaşî zîndan ra vejênê. Êdî wa pêro şar nêbizano. Ma do nê dejî heta key biancê?”

 

Hêvî Çep a Keske de ya  

 

Cinîya bi nameyê Fatma Yalçin zî wina vat: “Ma her tim bi hêvî yê. Ganî ma raya xo bidê Partîya Çep a Keske. Hemverê kurdan de hêrişî pê yenê. Heme partîyê hêvîya kurdan bî ameyî padayîş. La vindertiş çin o ma do dewam bikerê. Çiqas padê ma do abikerê. HDP, Partîya Çep a Keske ya. Partîya hêvî ya. Ma zî hêvî kenê. Ez bawer kena ke do na rey hîn çî bivuryê. Ma têkîş de bê. Seba ke tîya de hêvî esta.”

 

‘Partîya cinîyan a’

 

Semra Koyun zî vat, raya aye Partîya Çep a Keske rê ya û wina domna: “Oyo ke heqê cinîyan paweno HDP yo û dimayê HDPyî zî Partîya Çep a Keske ya. Tu bawerîya ma bi îqtîdarî nêmendo. Wextê înan de zî seba cinîyan tu çîyêk nêame kerdiş.”

 

Rukîye Yilmaz zî wina vat: “Erdlerzî de netîceyê polîtîkayê îqtîdarî de bi des hezaran kesî merdî. Seba nê raya xo dana Partîya Çep a Keske. Ma ciwanî do demokrasî awan bikerê. Ma demokrasî de bi qerar ê.”