Zelal Tunç

 

WAN - Wan de ciwanê ke do reya yewin o weçînayîşo ke do 14ê Gulane de pê bêro de raya xo bierzê dîyar kerdî ke ‘ameyoxê înan şert o’ û cinîyan zî da zanayîş ke ganî no şer peynî bibo, hesirê çiman nêro varnayîş û mesajê ‘Yew raye seba Kiliçdarogluyî yew raye seba Partîya Çep a Keske’ dayî.

 

Weçînayîşê serekkomarî û parlementerî yê demê 28ine ke do 14ê Gulane de pê bêro rê demêk kilm mend. Xebatê weçînayîşî yê partîyê sîyasî bêmaben dewam kena. Qet şik çin o ke nuqtaya esas ya weçînayîşî cinî û kişta ci de zî 6 mîlyon ciwan yê ke reya yewine do 14ê Gulane de şêrî sindoqan ser ê. Hûmara hemwelatijanê ke do reya yewine şêrî sindoqan ser û raye bierzê 4.904.672 ya.

 

Bedilnayîş şert o

 

Wan de cinî û ciwanî yê ke reya yewine do şêrê sindoqan ser derheqê weçînayîşî de qisey kerdî û reaksîyon vera şer, zext û tepiştişan mojnayî. Ciwanan dîyar kerd ke seba ameyoxê înan bedilnayîş şert o.

 

'Ganî no îqtîdar şêro’

 

Fedîle Kurte dîyar kerd ke do seba namzedê serekkomarîye raya xo bida Kemal Kiliçdaroglu û vat: “Do no seba ma xêrîn bibo. Seba ke ma kurd ê ma do raya xo bidê namzedê Partîya Çep a Keske. Ganî no îqtîdaro 20 serran bibedilîyo.”

 

 ‘No zilm do biqedîyo’

 

Hemwelatija bi nameyê Meryem Gule zî ard ziwan ke do raya xo bida Partîya Çep a Keske û wina dewam kerd: “Ma aştîye wazenê. Wa na gonî vindera. Wa dayîk nêbermê. Ma her roje bi zextan reyde yenê rî bi rî. Rojnamegerî xeberanê xo vera yenê tepiştiş. Hêvî kena ke no zilmê Erdoganî çinî bibo.” 

 

'Do ciwan bibedilnê’

 

Esra Gulmeze zî da zanayîş ke reya yewina ke do raya xo bierza û vat ke do ciwanî qerarêk raşt bigêrê û seba bedilnayîşî zî do raya xo bidê Kemal Kiliçdarogluyî.

 

‘Ma kurd ê’

 

Zanan Sevene bale ant weçînayîşo ke do 14ê Gulane de pê bêro ser û wina dewam kerd: “Ma kurd ê û HDPyî yê. Ma raya xo danê namzedanê ke HDPyî dîyar kerdo.” 

 

Berfîn Helîne zî vat ker reya yewina ke do raye bierza û do raya xo bida Partîya Çep a Keske.

 

'Partîya Çep hêvî dana’

 

Leyla Oztune zî dîyar kerd ke aye hetê edaletî de ya û do raya xo bida Partîya Çep a Keske û vat ke Partîya Çep a Keske hêvî dana cinî û ciwanan.