DÊRSIM - 1ê Gulane Dêrsim de bi rayberîya Platformê Ked û Demokrasî ke xeylêk partîyê sîyasî û rêxistinê komelê sivîl zî mîyan de ame pêşwazîkerdiş. Verfeka Partîya Çepê Kesk Çîgdem Kiliçgun Uçare pîrozbayî de wina vat: “Ma do vengêk xo seba  vîndîkerdişê rejîmê faşîst bidê û vengêk seba îdarekarîya kedkaran bidê. Ma do pîya bivurnê.”

Dêrsim de bi rayberîya Platformê Ked û Demokrasî ke xeylêk partîyê sîyasî û rêxistinê komelê sivîlî zî mîyan de ca gênê, pîrozbayîya 1ê Gulane Roja Yewîye, Têkoşîn û Paştdayîşî ame pîrozkerdiş. Partîyê siyasî û rêxistinê komelê sivîl, vernîya pîrozbayî Kuçeyê Hunerî de  ameyî têhet. Bi hezaran karkerê ke pêştemalê sendîkayî dayî xo ra, dest de pankart û flamayê 1ê Gulane Raşteyê Seyît Riza pirr kerdî. Bername bi deqeyêk rêzgirewtişî seba kesê  têkoşînê azadî û demokrasî dest pêkerd.

‘Jin jîyan azadî’

Serê nameyê Komîteya Amadekara Dêrsimî, Sekretera Şubeyê Egîtîm Senî Raîfe Yilmaz qisey kerd. Raîfe, dîyar kerd ke cuyêka bêtemînat temamê kedkaran yeno ferzkerdiş û wina vat: “Seba krîzê ekonomî xeylêk kesê roşinvîr şinê teberê welatî. Ganî no sîstem bêro vurnayîş.” Dimayê ke serê sehneyî de persê “Gulistan Doku ça de ya?” ame kerdiş, girseyê sloganê, “Jin, jiyan, azadî” berz kerd.

‘Demo rast, merdimo rast’

Verfeka Partîya Çep a Keske Çîgdem Kiliçgun Uçar vejîya serê sehnî. Çîgdeme, girse bi kirmanckî silam kerd û wina vat: “No îqtîdar karkeran kerd halêk wina ke vêşan şinê keye û nêeşkenê rîyê tutanê xo biewnê. Na rey vera ke şerm bikerê sloganê ‘demo rast, merdimo rast’ şuxulnenê. Bê şerm bikerê vanê demo rast. La ma do nê demî bikerê demê rast û do cuya ma bivuryo û demo rast awan bikerê. Ma do hemverê yewmêrdeyî rijyayî, têkoşînê cinîyan her cayî pîl bikerê û demê rast awan bikerê. Ma do hemverê sîyasetê cîyayî, sîyasetê demokratîk pîl bikerê û demê rast awan bikerê. Ma seserra diyîn ê komare de bibê kerdoxê awan kerd.

Ma do pîya bivurnê

Tifaqa Ked û Azadîye hemverê rejîmê yewmêrdeyî yo. Ma wazenê bi têkoşînê xo Tirkîya û komarêke demokratîk awan bikerê. Demê ma nê kenê, serê fermanê qesrî de operasyon yenê kerdiş. Hemverê Çapemenîya Azad ke sere nêtewênenê û kedkarê sîyasetê demokratîk operasyonan kenê. Do ewro zî bikerê, siba zî bikerê. Ma wazenê cuyêka wina awan bikerê ke êdî wina nêvirazî yo. Yê ke do serbikewê partîyêk siyasî la şima û kedkar do bi ser kewê. Yê ke nê têkoşînî heta ewro ardî, cinî yê. Wa sozê ma yê seba Gulistan Doku bo; do nê têkoşîn de serbikewê û îqtîdarê ke aqûbetê ci dîyar nêkerd vînî bikero. Ma do pîya cuyêka têduşt awan bikerê. No weçînayîş krîtîk o; ma do raya xo seba vîndîkerdişê rejîmê faşîst bidê Kiliçdaroglû û raya xo ya bîn zî bidê Partiya Çep a Keske. Ma do pîya bivurnê.”

Sewbîna temsîlkarê partiyê siyasî yê bînî û rêxistinê komelê sivîl zî vejîyayî serê sehne û mesajê 1ê Gulane pare kerdî.

Pîrozbayî, bi goşdarîkerdişê deyîran peynî bî.