Gulîstan Dursun

 

RIHA - Hetkara Sereka Baroyê Rihaye Gulîstan Paydaşe veng daye avûkatanê bajarî ke asayîşê weçînayîşî de ca bigîrê û vat: “Ma do heta sibayî şîyar bibê, seba asayîşê weçînayîşî ma do paştîdayîşê huqûqî bikerê.”

 

Hetêk de partîyê sîyasî û tifaq xebatê xo yê weçînayîşî domnenê û heto bîn de zî asayîşê weçînayîşî rojeve de ya. bi taybetî operasyonê qirkerdişê sîyasî yê tepiştiş û destbendkerdişî ke hetê AKP-MHPyî ra yeno kerdiş, derheqê asayîşê sindoqan de şikan zêdîneno. Ma Hetkara Sereka Baroyê Rihaye Avûkat Gulîstan Paydaşe reyde derheqê asayîşê weçînayîş û amadekarîyê Rihaye de qisey kerd.

 

'Ganî her kes wezîfeyê xo bîyaro ca’

 

Gulîstane da zanayîş ke lazim keno heme aktorê ke prosesê weçînayîşî de ca gênê bi hawayêko adil, heqdar, raştvatiş, bêhet û şefaf têbigêrê û wina dewam kerd: “Asayîşê weçînayîşî, her çî ra ver, zerrîwazî û bawerîya weçînitoxan lazim keno. hedîseyê ke weçînayîşanê verênan yê Rihaye de qewimîyayî yeno vîrê ma. Eke her kes wezîfeyê xo bîyaro ca qet bêhuqûqî nêvirazîyeno.”

 

'Her kes eşkeno tewrê weçînayîşî bibo’

 

Gulîstane dîyar kerd ke Baroyê Rihaye no demêk dergo ke derheqê asayîşê weçînayîşî de xebetîyeno û wina domna: “Ma madeyê ke qanûn û rêziknameyê weçînayîşî de sey suc yenê hesibnayîş kerd broşur. Ma do na babete de broşuran vilayê her hetan kenê. Vîşêrê nê ma semînerê seba asayîş û pawitişê weçînayîşî zî viraşt û virazenê. Kam ke hemkarê ma yê zerrîwazî bo, kam ke rêxistinê ma yê sivîl yê teberî ra bo, ê eşkenê tewrê perwerdeyê ma û winasîyan bibê. Serê nameyê asayîşê weçînayîşî ma bi hawayêk akerde perwerde dane teberî.” 

 

Broşur ameyî amadekerdiş

 

Heto bîn de Gulîstane dîyar kerd ke platformê weçînayîşî seba ke roja weçînayîşî de hetêk de koordinasyon bêro kerdiş ameyo awankerdiş û wina ercnaye: “Her hetê ke raşteyan de do wezîfeyê xo yê avûkatî bîyaro ca do ma rê malumatan bido. Wexto ke problem bivejîyo ma do avukata/o tewr nizdî bişirawê raşteyê problemî. Her partî do roja weçînayîşî de avûkatêk bi name bikera ke înan reyde bi koordinasyon bixebetê. Broşurê ke derheqê sucê weçînayîşî de ameyî çapkerdiş do weçînitoxan rê bêro vilakerdiş. Heme avûkatê partîye do kartê çimdarîyê baroyî bigîrê û belgeyê desturnameyê partîya înan zî kişta înan de bibo. Roja weçînayîşî de do wekîl derheqê probleme hemkaranê xo de malumat bida û ma do zî îtîraz û gerre bikerê.”

 

'Ma do paştîdayîşê huqûqî bikerê'

 

Gulîstane qiseykerdişê xo yê peyênan de bale ant avûkatê qeydê Baroyê Rihaye yî ser û vat: “Keremê xo ra tewrê weçînayîşî bibê. Ez sey zerrîwaze pêşnîyaz kena ke şima sey muşaîdê Baroyê Rihaye tewrê pawitişê sindoqan bibî. Vîşêrê înan ma hemwelatijanê xo ra wazenê ke weçînayîş de bêusulîyêk nêbo, tedbîrê ferzî bêrê girewtiş û eke na babete de malumatê qanûnî yê ferz çinî bî, ma wazenê bi rayîrê avûkatan waştiş, îtîraz û gerre bikerê. Ma Serekatîya Baroyê Rihaye, endamê heyete rayîrberî û xeylê hemrayê ma nê fikrî de yî aye roje nêrakewê. Ma do heta serê sibayî şîyar bibê û seba asayîşê weçînayîşî heme paştîdayîşê qanûnî ke deste ma ra bêro ma do bikerê.”