Melîke Aydin

 

ÎZMÎR - Cinîyê Îzmîrî derheqê weçînayîşî de ercnayîşê xo ardî ziwan ser û polîtîkayê AKPyî yê derheqê ekonomî cinîyan rexne kerd û vatî ke êdî bedilnayîş wazenê.

 

Weçînayîşê serekkomarî û parlamenterîye yê donemê 28ine rê 9 roje mend. Partîyê sîyasî xebatê xo yê weçînayîşî bêmaben domnenê. Hemwelatîyê Îzmîrî derheqê weçînayîşî de qisey kerd. Cinîyan polîtîkaya ekonomî û polîtîkaya derheqê cinîyan rexne kerd û ciwanan zî dîyar kerd ke hetê ameyoxê xo ra bi qesawet ê. 

 

‘Ciwan nêwazenê Tirkîya de bicuyê’

 

Wendekara lîseye Yagmur Yanika ke reya yewina ke raya xo erzena dîyar kerd ke babeta ameyî ra bi qesawet a û vat: “Nika hem cinî û hem zî wendekarî probleman cuyenê. Ganî no bibedilîyo. Îhtîmalê bedilnayîşê merdiman heyecan dano. Ez 18 serrî ya, bedilnayîş wazena. Rewşa welat vera hemwelatijî verê xo danê teberê welatî. Ez wazena tîya de biciwîya la îmkan çin o. Wexto ke raye bêra dayîş ganî ameyox verê çiman de bêro girewtiş.”

 

‘Ekonomîya welat têk şîya’

 

Nazli Erdogane Fransa de ciwîyena û seba raya xo ameya Îzmîrî. Nazliye wina vat: “Prosesê weçînayîşî zaf krîtîk o. Ez hemwelatijêka dilet a. Her çî vaye yo. Ekonomî zaf xirab a. Tirkîya de azadî çinî ya. Ekonomî bin kewta. Ma tîya de Euro bi TL danî la pê çîyêk zî nîno girewtiş. Ciwanîya mi tîya de derbaz bî. Ez nêwazena fek tîya ra vera bida.”

 

Denîz Gula ke Almanya ra seba raye eştişî ameya Îzmîrî wina vana: “Ekonomî, polîtîkayê hemverê cinîyan û têkilîya merdiman. Her çî xeripîyayo. Rewşa tîya zaf xirab a. Qet nêbo uca de hîna zêde qîmet dîyeno cinî û merdiman. Tîya de zext zêde yo. No weçînayîş weçînayîşêk krîtîk o. Beno ke merdim na babete de xo îfade bikerê.” 

 

Kedkara keyeyî Bahar Yilmaza 82 serre zî veng daye heme cinîyan û da zanayîş ke ganî cinî bifikirî û qerar bidê.

 

Memura teqawîte Hanîfe Tanere zî wina qisey kerd: “Polîtîkaya îqtîdarî her hetî ra bi hawayêk negatîf tesîr kena. Betalî, vaye. Feqîr bîyo kole. Hirê tutê mi estê. Rewşa înan normal a. Erdlerzî de hemwelatijî binê xirban de serd vera merdî. Merdimîye, Misilmanî, dewletbîyayîş no yo acaba? Merdiman ganî ganî kerdî bin erd. Wa îqtîdar bi lez şêro.”  

 

‘Şar vêşan ciwîyeno’ 

 

Kedkara keyeyî Candeger Demîrcî zî dîyar kerd ke şar bi problemê vêşanî reyde rî bi rî yo û wina domna: “Ma nêbaş ê. Cuye vay a, her çî berbat bîyo. Vindenê vanê ma demê weçînayîşî de erjan kenê. Vanê ma enflasyon fînenê. La sebebê vayîye îdarekar ê. Ma nêeşkenê pîyaz bigîrê. Sebze û fêkî zaf vay ê. Yê ke tutê înan estê, yê ke kîra danê se kenê?”

 

‘Qalê şerî kenê’

 

Nuştoxe û mamoste Banu Îmer zî dîyar kerd ke welatê ke heq, edelet û azadî çinbo merdim nêwazeno biciwîyo û wina vat: “La no welat welatê min o û lazimîyê her kesî pê esto. Ez azadîye wazena. Ez wazena cinîyî azad bê, ciwanî azad bê. La tabloyêk nêbaş esto. Kîraya min a 4 hezarî vetî 11 hezarî. Ma dewa akerd. Nê zêdebîyayîşê normal nîyê. Krîzêk pîl esto. Qalê şerî kenê. Gelo do ma vera bidê kuçeyan? Ma çin hesibnenê. La heta peynî ma do  welat û heqê xo bipawê.”