ANQARA - Hemvervatoxa Komîsyonê Heqanê Merdiman û Huqûqî yê HDPyî Nuray Ozdogan dîyar kerd aşmêk de 295 kesî ameyî destbendkerdiş û 61 kesî tepişîyayî û vat: “Ma do destûr nêdê îqtîdar wareyê weçînayîşî açarno wareyê şîdetî.”

 

Hemvervatoxa Komîsyonê Heqanê Merdiman û Huqûqî yê HDPyî Nuraye Ozdogane derheqê operasyonanê qirkerdişê sîyasîyî de merkezê partîya xo de kombîyayîşê çapemenîye kerd. 

 

‘AKP kewto mîyanê ters û xofî’

 

Nuraye bale ant serê bîlançoyê aşmêk peyîn ê destbendkerdişî û tepişteyan û vat: “14ê nîsanede Riha de hemserekê ma zî tede 12 kesî, Îstanbul de endamê Meclîsê Ciwanan zî tede 16 kesî, 25ê nîsane de Amed de 143 kesî ameyî destbendkerdene. Nînan ra 5ê ci avûkatî û 4ê ci rojnamegerî 48 kesî ameyî tepiştene. Reyna 26ê adare de namzeda Partîya Çep a Keske tepişîyaye, 27ê nîsane de Mûş de xeylêk kesî û 29ê nîsane de reyna 19 kesî ameyî destbendkerdene. 3yê gulane Roja Çapemenîya Azade de 2 rojnamegerî zî tede 5 kesî tepişîyayî. 29ê nîsane de polîsan hêrişê kovoyê ma kerd û 3 embazê ma derb kerdî. 30ê nîsane de 4 xebatkarê partîya ma tepişîyayî. Reyna dima vizêr Hemserekê ESPyî zî tede 7 kesî tepişîyayî. AKP kewto mîyanê ters û xofî.”

 

‘Do no kay û dişminayî 14ê Gulane de peynî bibo’

 

Nuraye bale ant serê vatişê Suleyman Soylu û wina vat: “AKP-MHP netîceya weçînayîşan ra terseno. Wezîrê Karanê Zereyî Suleyman Soylu weçînayîşê 14ê gulane sey 'darbe' pênase kerdî. Seba asayîşê weçînayîşan ganî cade Soylu erkî ra bigêrîyo. Reyna Erdogan û partîgîrê ci bi zelalî qiseykerdişanê xo de qala mudaxeleyê weçînayîşan kenê. Eşkera yo ke îqtîdar pê operasyon û hêrişan peyê provakasyonan de yo. Îtîfaqê Kede û Azadîye verê nê provokasyonan de hişyar o. Ma weçînayîşanê 14ê gulane rê amade yê. Ma do nê weçînayîşan de teyna rayanê xo ney rayanê pêro partîyan bipawê. Ma venga pêro rayaumûmîye, muxalîfan, demokratan û şarê xo danê ke vera provakasyonan hişyar bibê, pîya têbigêrê û prosesê weçînayîşî de sey îtîfaqê demokrasî bixebitê.”