Sema Çaglak

 

ŞIRNEX - Cinîyê bajarokê Deştadarê ya Hezexî dîyar kerdî ke ê do seba heqanê ziwan, nasname û azadîya tepişteyan raya xo bidê Partîya Çep a Keske û vengê wayîrvejîyayîşê sindoqan kerd.

 

Weçînayîşê 14ê Gulane yê parlementerî û serekkomarî yê demê 28ine rê tena çend roje mend. Bi nizdîbîyayîşê weçînayîşî têgêrayîşê partîyan yê xebatan zî zêde bî. Cinîyê bajarokê Deştadarê ya qezaya Hezexî ya Şirnexî derheqê weçînayîşî de veng da û mesajê wayîrvejîyaîyşî kerdî.

 

‘Ma do no sîstemo lêşin birijnê’

 

Maşallah Koşmaze da zanayîş ke seba bedilnayîşê nê sîstemo lêşin ê do raya xo bidê Partîya Çep a Keske û vat: “Bedilnayîşê nê sîstemî azadîya cinîye zî ano. Eke Partîya ma ser bikewa do cinî zî ser bikewa û komel zî ser bikewo. Vengdayîşê mi no yo ke 14ê Gulane de şarê ma wa şêro sindoqan ser û wayîrê raya xo û partîya xo bivejîyo.”

 

‘Seba heqanê ziwanê maye’ 

 

Zumreten Çakire ard ziwan ke 14ê Gulane de serkewtiş wazenê û wina domna: “Wayîrê rayanê xo bivejêne. Ma heqê ziwanê maye wazenê. Seba tepişteyan, seba azadîya Serek Apo û seba nasnameyê xo ez do raya xo bida Partîya Çep a Keske. Jin Jiyan Azadî.”

 

Elîf Koşmaze zî dîyar kerd ke xeylê sebebê înan esto ke ê ser bikewê û wina vat: “Ma do nê weçînayîşî de peynîya zilmî bîyarê û herra xo azad bikerê. Seba azadîya tepişteyan, seba ziwanê maye û vera tecrîdî de ganî ma bi ser bikewê.”

 

‘Ma do raya xo bidê xo’

 

Rahîme Akmane vat ke êdî serkewtiş înan rê ferz o û qiseykerdişê xo wina dewam kerd: “Seba serkewtişî, seba azadîye, seba ziwanê xo, seba xelisnayayîşê bindestîye ra ma do raya xo bidê Partîya Çep a Keske. Êdî serkewtiş ferz o. Ganî Kurdî bibî yew û serkewtişî bîyarê. Eke ma bibê yew ma do her hetî ra ser bikewê. Ma koletîye qebul nêkenê.”

 

‘Do serkewtiş bibo yê ma’

 

Şafak Aktane zî dîyar kerd ke xeylê çîyî destê cinîye de yo û vat: “Eke ma bi ser bikewê do komel ser bikewo. Ma do raya xo bidê Partîya Çep a Keske. Coka ra zî Partîya Çep a Keske veng û rengê ma ya û xîtabê ma kena.” 

 

Cinîyan ra tewr peynî Salîha Teke qisey kerd û bale ant yewîya kurdan ser û wina veng daye: “Ez raya xo dana Partîya Çep a Keske. Seba ziwan û nasnameyê xo. Vîşêrê partîya ma tu partîyêk heqanê ma nêpawena. Ma serkewtiş û aştîye wazenê. Seba aştî, seyyewbînanî û azadîye ma do 14ê Gulane de nê îqtîdarî bişirawê û do serkewtiş bibo yê ma.”