SEMSÛR - Weçînayîşî rê demêk kilm mend û Semsûr de hûmara sindoqê bêrê awankerdiş dîyar bî. Endama meclîsê şardarîye Suzan Şan da zanayîş seba kesê erdlerzî de bajar ra vejîyayê veng da û vat, wa bêrê rayanê xo bişuxulênê.

 

Weçînayîşan rê demêk kilm mend û bajarê ke erdlerz ra tesîr bî zî xebatî bêmabên yenê kerdiş. Herêmê  erdlerzeyê ke reaksîyon vera îqtîdarî domnenê, do  14ê Gulane de hesabê vînîbîyayeyanê xo pers bikerê.

 

Endama meclîsê şaredarîye Suzan Şane derheqê asayîşê weçînayîşî yê Semsûrî de ercnayîşan kerd.

 

‘Vayê weçînayîşê 2015ine esto’

 

Suzane vat, Partîya Çep a Keske Semsur de xebatanê xo domnena û vat: “Ma şî pêro dewan. Ma serdayîşê dewe û qezayan kerd. Ma do şêrê her cayî. Ma bernameyê xo vet. Ma hetê vurnayîşî de yê. Vayê vurnayîşî hetê Partîya Çep a Keske ra yeno. Ma bi dej û şînê xo şinê weçînayîşan. Ma vayê weçînayîşê 2015ine gênê. Hêvîya ma esta ke nê sindoqan de zî do bi tesîr bo. Partîya Çep a Keske roja ewilî yê erdlerzî de kîşte welatijan de bî. Ez zî erdlerze ya û roja ewilî de ma kordînasyonê krîzî awan kerd û ma kîşte şarê xo de bî. Ma masaya krîzî awan kerd. Ma kombîyayîş kerd û dest bi xebatan kerd. Şarî vernê de ma kîşte xo de dî. Werdê ewilî ma viraşt. Ma sey cinî kîşte înan de bî. Ma erdlerz de şî pêro dewan. Ma destê xo da heme merdiman.”

 

‘Ma adetê HADEPî ra yenê’ 

 

Suzane bale ant serê tepiştiş û destbendkerdişê namzed, rojnameger û avûkatan û wina reaksîyon mojna: “Ma zanenê ke no operasyonêk hemverê asayîşê weçînayîşî yo. Yê ke ameyê tepiştiş û destbendkerdiş embazê ma bî. No tepiştiş seba asayîşê sindoqan bi. Bêşik nê hêrîşî ma nêpelçiqnenê. Ma adetê HADEPî ra yenê.”

 

Semsûr çar herêman de ame visnayîş

 

Suzane ard ziwan ke do Semsur de hezar û 452 sindoqî bêrê awankerdiş û wezîfeyê hezar û 446 sindoqî temam bîyê û vat: “Erdlerz de welatijê dinyaya xo bedelnayî yan zî şîyê cayê bînî estê. Ma  Semsûrî çar parçeyî rê visna. Her herêmêke de temsîlkarêk ê qezayî esto. Her dibistanêk de berpirsîyar estê. Serê her sindoqêk de do wezîfedarêk ma bibo û pêwa nê di embazê ma yê avûkatî her qeza de bişuxulîyê. Problemê ke vejîyê de do mudaxale bikerê. Do destê her embazê ma de qertê agahdarkerdişî bibo. Nê qertan de do numareyê telefonî yê embazê ma yê xebatkaran bibê.”

 

Suzane wina qedêna: “Rojane nêzdîyê 50 kesê teberê bajarî ma gêrenê. Vanê ma wazenê bêrê rayanê xo bişuxulênê. Ma na babete de înan rê benê hetkar. Derheqê nê de merkezê pêroyî de xebatî yenê kerdiş. Xebatê ‘ça benê wa bibê wa rayanê xo bişuxulênê’ estê. Ma serê çapemenîya komelî zî pare kenê. Wa xo biresnê ma û ma înan berê serê sindoqan. Wa kes nêterso. Yewin rayîrê vernî tedayan pado şuxulnayîşê rayan o.”