AMED - Namzedê parlamenterîye yê Partîya Çep a Keske do mîtîngê fînalî 13ê Gulane de Amed de bêro kerdiş, qeza û taxanê bajarî de vilawikî vila kerdî û venga şarî kerdî ke roja şeme tewrê mîtîngê raşteyê Îstasyonî de bêro kerdiş, bibê.

 

Seba Weçînayîşê Serekkomarî û Weçînayîşê Parlamenterî yê Serdemê 28ine ke 14ê Gulane de bêro kerdiş, xebatê weçînayîşî yê partîyê siyasî bêmabên dewam kenê. Partîya Çep a Keske zî do  13ê Gulane de Amed de mîtîngê fînalî pê bîyaro. Bi tewrbîyayîşê Hemsereka Pêroyî ya Partîya Herêmê Demokratîke (DBP) Salîha Aydenîz û namzedê parlamenterî, seba mîtîngê ke do roja Şemeyî saete 13.00ine de dest pêbikero, xeylê cayê bajarî de vilawekî ameyî vilakerdiş.

 

Licê

 

Licê de bi tewrbîyayîşê Namzeda parlamenterî ya Amedî ya Partiya Çep a Keske Sorgul Aytek Avşar, îdarekar û endamê rêxistina qezayî û aktîvîstê Tevgerê Cinîyanê Azadan (TJA) esnafan zîyaret kerdî û şarî dawetê mîtîngê roja Şemeyî kerdî.

 

Sûr

 

Sûr de bi tewrbîyayîşê namzedê Partîya Çep a Keske Adalet Kaya, Serhat Eren û Verfeka Bajarî ya Partiya Çep a Keske Pinar Sakik Tekîn vilawikî ameyî vilakerdiş. Demê vilakerdişê vilawikan de namzedan eleqeyêk pîl şarî ra vînayî. 

 

Rezan

 

Namzedê parlamenterîye yê Partîya Çep a Keske ya Amedî Ceylan Akça û Hemserekê Partîya Demokratîke ya Şaran (HDP) ê Amedî Zeyyat Ceylan, qezaya Rezanî ya Amedî de serdayîşê esnafan kerd. Serdayîşî de welatijan eleqeyêk pîl nîşanê namzedan mojnayî û mesajê, "Ma do qetî serbikewê” ame dayîş.