Rozerîn Gultekîn

 

STENBOL - Cinîyê ke Kadikoyê Stenbolî de ciwîyenê dîyar kerdî ke seba aştî û azadîye do raya xo bierzê û AKP-MHPyî bişirawê.

 

Xebata weçînayîşî bê maben dewam kena. Cinîyî dîyar kenê ke seba tîfaqê dişmenê cinîyan peynî bibo do raya xo bida Partîya Çep a Keske û seba serekkomarîye zî bida Kemal Kiliçdarogluyî.

 

Cinîyê ke qezaya Kadikoyî ya Stenbolî de ciwîyenê derheqê weçînayîşî de ajansê ma rê qisey kerdî.

 

‘Raya ma seba Partîya Çep a Keske ya’

 

Muzîsyen Cemîle Demîre ercnayîşê xo wina ard ziwan: “Ma sîstemêk ke tede her kes azad ciwîyeno wazenê. Ganî her kes bi hawayêk azad fikre xo bîyaro ziwan. Ganî merdim nê semedî ra terorîst nêro îlankerdiş. Seba serekkomarîye raya xo ez dana Kiliçdarogluyî. Ya parlementerîye zî dana Partîya Çep a Keske. Seba heme şaran ameyoxêk azad wazena. Welatêk azad wazena. Ganî AKP êdî şêro.”

 

‘Wa raya xo bidî Partîya Çep a Keske’

 

Karkera keyeyî Mahfuza Acere zî da zanayîş ke ê pawenê ke weçînayîş rayîrê aştî û azadîye akero û wina domna: “Hêvîya ma no yo ke ma weçînayîşî de qezenc bikerî û welatêk azad û têduştî de biciwîyê. Ma qet hêvîya xo vînî nêkenê. Ez raya xo seba aştîye dana Partîya Çep a Keske. Wa heme cinîyî raya xo bidê Partîya Çep a Keske.”

 

‘No 20 serrî yo ke ma bêzar bîyî’

 

Şukran Gulene vat ke yewine waştişê înan demokrasî û aştîye yo ke bêro welat û wina dewam kerd: “Wa dizî û zûre peynî bibî. Ma wazenê ke bi pêroyî bibedilîyo. 20 serrî yo ma êdî bêzar bîyî. CHP bêro do azadîya cinîyan zî bêra.”

 

Karkera keyeyî Guler Ercane zî ard ziwan ke nê weçînayîşî de waştişê xeylê cinîyan esto û waştişê aye zî seyyewbînanî û azadîye yo. Gulere vat ke wa demokrasê bêra û do raya xo zî seba Tirkîyayêk azade bierza.

 

Cinîyan ra tewr peynî Reyhan Kokluye qisey kerd û aye zî bale ant muhîmîya weçînayîşî ser û da zanayîş ke ganî êdî bedilnayîş pê bêro û serê sibayê 14ê Gulane de biewnî dolabê xo û dima ra şêrî sindoqan ser. Reyhan tewr peynî vat ke do cinîyî nê weçînayîşî de ser bikewê.