ÎZMÎR - Sîyasetmedaran dîyar kerd ke ganî seba çareserîya problemê Kurd, seyyewbînanî û azadîye mohrê xo yê êrê Partîya Çep a Keske rê pirodê û vatî ke ganî rejîmê yew camêrdî şêro.

 

Siba 14ê Gulane roja weçînayîşê parlementerê û serekomarî yê donemê 28ine ya. Sîyasetmedaran dîyar kerd ke seba Peymana Stenbolî û Qanûna Hûmara 6284ine raye ganî bidîya Partîya Çep a Keske.

 

‘Berpirsîyarîya ma esta’

 

Hemsereka HDPyî ya Îzmîrî Berna Çelîke da zanayîş ke nê prosesî de xeylê hêvîyê şarî esto û wina dewam kerd: “No 20 serrî yo ke ma rejîmê yew camêrdî reyde ciwîyenê. Welat bedilîyayo raşteyê şerî. Merdim ameyî qetilkerdiş û her roje qirkerdiş zêde beno. Feqîrî vejîya merheleya tewr cor. Merdim ame merheleya ke nêeşko nan bigêro. Partîya Çep a Keske partîya mifteyî ya. Badê weçînayîşê 14ê Gulane bedilnayîşê prosesî zî wina do asan nêbo. Ma do îqqtîdaro faşîstî ra bixelisî. Berpirsîyarîya ma heme kesan esta ke ma nê sîstemî bibedilnî. Ma vengê xo newe kenî. Raya xo bidêne Partîya Çep a Keske, mohrê xo Partîya Çep a Keske rê pirodê.”

 

‘Prolemê girdi estî’

 

Hemverfeka Partîya Çep a Mîlasî Sanîye Sarare zî eşkera kerd ke aye azadî û edaletî wazena, wazena cinî û domanî azad bibî û wina vat: “Ma heqê cuye wazenê. Nê welatî de probleme girdî estî. Înan ra yew zî yê Kurd û yê nasnameyî yo. Ma do nê probleman pîya çareser bikerî. Coka ra ganî ma raya xo bidî Partîya Çep a Keske.”

 

Verfeka herêma Egeyî ya DBPyî Neslîhan Arşîv zî dîyar kerd ke prosesêk krîtîk ra derbaz benê û ciwanî şertê zehmet de ciwîyenê û wina vat: “Ganî her kes dorê Partîya Çep a Keske de bibo yew. Ameyoxê ma bi Partîya Çep a Keske mumkin o. Partîya Çep a Keske partîya cinîyan a, partîya ciwanan a. Seba nê ganî ameyox de raya xo bidê Partîya Çep a Keske.”

 

Cinîyî do netîceyê weçînayîşî dîyar bikerê

 

Verfeka Meclîsê Cinîyan ê Partîya Çep a Keske Meryem Gulbudak zî dîyar kerd ke hewl danê cuyêka têduşt û azade awan bikerê û wina vat: “Seba nê ma têkoşînêk pîlî de yê. Ma estê. Ma her raşte de yê. Do cinî nê weçînayîşî dîyar bikerê. Ferasetê ke huqûqê şerîatî wazenê vejîyayî werte. Sey Huda-Par. Na rewşêke bi endîşe ya. No ferasetêk serdemê mîyanên o. Derdê înan oyo ke ma hepsê keyeyî bikerê. La ma hetê cuyêka têduşt de yê. Afîşanê ma de cinîyî û camêrdî têhet de yê. Ma reyde hemverfekî esto. Têduştî esto. Kota sera 50 esta. Ma do  Peymana Stenbolî û qanûnê hûmara 6284 pê bîyarê.”