WAN - Endama Meclîsê Şaredarîya Artemêtanê Guneş Ogmen Korkmaz derheqê "Belgeyê Helwestî yê Hemverê Şîdetî" ke hetê Şaredarîya Artemêtî ra ameya îmzakerdiş vat: "Semedo ke ma pêro cinîyê ke mîyanê şaredarîye de yê bipawê, ma no belgeyê helwestî amade kerd. No tena destpêk o. Ma a bawerî de yê ke ma semedê cinîyan xebatêke başêr bikerê."

 

Şaredarîya qezaya Artemêtê merkezê Wanî semedo ke şîdet û tacîzo ke şaredarî de cinîyan ser o bêro kerdiş asteng bikero "Belgeyê Helwestî yê Hemverê Şîdetî" îmza kerd. 

 

Şaredare Rabîa Başak Koç û endamê meclîsê şaredarîye Medya Mermit û Guneş Ogmen derheqê "Belgeyê Helwestî yê Hemverê Şîdetî" ke îmza kerd de ercnayîş kerd.

 

'Ma her hetê cuye de est bî û ma do bibê'

 

Hemşaredara Artemêtanî Rabîa Başak Koç wina vat: “Bi nê belgeyî ma dîyar kerd je ma do hemverê şîdet û mobîngî de bi xebatkarê şaredarîye û hevalanê xo yê cinîyan dir bê. Her şert û mercan de hemverê zîhnîyetê camêrdî, ma do hevalanê cinîyan dir bê. Ma soz da ke ma do kîşte pêro hevalanê xo yê cinî, dayîk û ciwanê ke pêro yewîneyan de xebityenê bê û hemverê zîhnîyetê serdestî yê camêrdan ê bi serran o yeno kerdiş, helwestê xo bimojnê. Ma cinî est bî, ma est ê û ma do her wareyî de bîyayîşê xo dewam bikerê.”

 

'Hemverê şîdet û zordarîyê cinîyan ser o peyman îmza kerd'

 

Endama Meclîsê Şaredarîya Artemêtanî Media Mermit zî vat: “Ma peymanêke yê bi nê rengî hemverê şîdetê psîkolojî û zextê cinîyan ser ê kargehê dinya îmza kerd. “Semedo ke nê demê peyîn de şîdet û tacîzê cinîyan ser o zêde bîyo, waştişêk ma yê wina pêro şaredarîyanê ma rê est o.”

 

'No tena destpêk o'

 

Endama Meclîsê Şaredarîya Artemêtanî Guneş Ogmen Korkmaz zî tewr peyîn wina vat: “Sey Şaredarîya Artemêtanî ma belgeyê helwestî hemverê her tewir şîdetî îmza kerd. No zî projeyê ma bî û ma ewro pê ard. Semedê pêro cinîyanê mîyanê şaredarîye de şîdet ra bipawê, ma nê belgeyê helwestî amade kerd. No tena destpêk o. Ma a bawerîye de yê ke ma do semedê cinîyan xebatêke başêr bikerê.”