Pelşîn Çetînkaya

 

ÊLIH - Parlamentera DEM Partîye Zeynep Oduncu derheqê “Mîtîngê Demokrasî û Azadîye” ke do bi hezaran kesî bajarê Kurdistan û Tirkîya ra beşdar bibê qisey kerd û dîyar kerd ke qeyûm û pêro problemê ke ameyê ciwîyayîş, tecrîdî dir girêdaye yê û ganî tecrîd bêro wedaritiş û azadîya fîzîkî ya Rayberê PKKyî Abdullah Ocalanî bêro qetîkerdiş.

 

4ê Teşrîna Peyêne de qeyûm tayînê Şaredarîya Êlihî, Şaredarîya Xelfetî û Şaredarîya Bajarê Pîlî ya Mêrdînî ame kerdiş. Badê ke qeyûm ame tayînkerdiş, hem bajaranê Kurdistanî û hem zî bajaranê Tirkîya çalakîyê protestoyî ameyî kerdiş. Bi taybetî çalakî roja ke qeyûm ame tayînkerdiş heta ewro bêmabên Êlih de dewam kerd. 

 

Semedê paştdayîşê xoverdayîşê şarê Êlihî, hemverê tayînkerdişê qeyûm û bi taybetî zî hemverê tecrîdî yê  Rayberê PKKyî Abdullah Ocalanî, Platformê Sazgehê Demokratîke do siba Elih de "Mîtîngê Demokrasî û Azadîye" organîze bikerê. Do pêro bajarê Kurdistanî û Tirkîya bi hezaran kesî û xeylêk partîyê sîyasî beşdarê mîtîngê ke do saete 13.00ine û Rayîrê Kuçeyê Amedî de bêro organîzekerdiş bibê. Sewbîna aktîvîstê Têgêrayîşê Cinîyanê Azadan (TJA) do saete 12.00ine de sey kortej Parkê Yilmaz Guneyî de kom bibê û beşdarê mîtîngî bibê. 

 

Hemsereka Pêroyî ya Partîya Têduştî û Demokrasî (DEM Partî) Tulay Hatimogullari, Hemserekê Pêroyî yê Partîya Herêmê Demokratîke (DBP) Keskîn Bayindir, Aktîvîsta TJAyî Ayla Akat Ata, Kolektîfê Rîtmê Azadî do beşdarê mîtîngî bibê. 

 

Derheqê mîtîngî de Parlamentera DEM Partîye Zeynep Oduncu ajansê ma JINNEWSî rê qisey kerd.

 

Zeynep Oduncu, dîyar kerd 3 demî yo qeyûm tayînê şaredarî benê û vat: "Bî 3 dewrî yo qeyûm tayînê şaredarîya Êlihî kenê. Hemşaredarî ameyî destbendkerdiş, yan zî ameyî tepiştiş û qeyûm vera înan tayîn kerdî. Edîp Solmaz zî şaredarê Êlihî bî, ame qetilkerdiş. Ewro reyke bîn qeyûm ame tayînkerdiş. Ma zanê ke tayînkerdişê qeyûmî, yeno manaya qirkerdişê şarê kurdî. Eynî wextî de roja ke Birêz Abdullah Ocalan esîr ame girewtiş, heta ewro hêrişî zêde bî.”

 

'Semedê çareserî ganî Abdullah Ocalan azad bibo' 

 

Zeynep Oduncu, dewam de wina vat: "Semedê çareserîya probleman, ganî Birêz Abdullah Ocalan azad bibi. Labelê her roja ke tecrîd yeno kûrkerdiş, şer tewr zêde Kurdistan de vila bibo, qetilkerdiş û qirkerdiş dewam keno. Ma tena tayînkerdişî qeyûmî sey xespkerdişê şaredarîyan nêvînenê. Tayînkerdişê qeyûmî yeno manaya çinhesibnayîşê îrade, ziwan, kultur û hunerî. Nê pîya girêdayeyê. Nê semedî ra mîtîngo ke do siba yan zî 17ê teşrîna peyêne de bêro organîzekerdiş, do bibo venga zorberdişê tecrîdê Îmraliyî û qetîkerdişê azadîya fîzîkî ya Birêz Abdullah Ocalanî. Semedê aştîye ganî masaya diyalogî reyke bîn bêro awankerdiş." 

  

'Ma do têkoşînê xo dewam bikerê'

 

Zeynep Oduncu, venga tewrbîyayîşê mîtîngî kerd û wina qedêna: "Şarê Êlihî wayîrê îradeyê xo vejêno. Şewe û roje têkoşîn keno. Ma do siba yanî 17ê teşrîna peyêne de Êlih de hemverê tayînkerdişê qeyûm, hemverê tecrîdî meydanan de bê û ma do têkoşînê xo dewam bikerê.”