Derya Ren

 

MEREŞ - Cinîyê Bazarcixî dîyar kerdî ke pêwa serrêke erdlerzî ser o derbaz bîyo zî mecbûr mendî konteynir de bimanê, dîyar kerdî sozê ke hetê dewlete ra ameyê dayîş bi ca nêameyî û vatî, "Ma tu destek nêgirewt."

 

Erdlerzê bi lerzê 7,8 û 7,5ine ke 6ê Sibata 2023ine de merkezê ci Mereş bî, sey felaketê tewr pîlî yê serre ameyî qeydkerdiş. Goreyê dayeyê fermî, merkezê Mereşî de navenda erdhejê 12 hezar û 713 kesî dinyaya xo bedelnayî û bi hezaran kesî zî birîndar bîyî. Hûmara awanîyê ke rijyayî 15 hezar û 940, awanîyê ke ganî bi lezgînî bêrê rijnayîş zî 19 hezar û 194ê.

 

Bazarcix de erdlerzeyî hema mecbûr ê ke awanîyê ke zirarêk pîl dîyê de bimanê. Nêresnayîşê TOKÎyan semedê wayîranê xo û nêzelalîyê vayîya keyeyan, semedê agêrayîşê mexdûrê erdlerzî yê cuya xo ya asayî astengê tewr pîl ê.

 

Mexdûrê erdlerzî ke derheqê babete de ajansê ma rê qisey kerdî, semedê sozê ke ameyê dayîş gerre û gazinc kerdî û dîyar kerdî badê erdlerzî selahîyetdaran hetkarî nêdayî înan.

 

Sozê xo nêgirewtî

 

Bedrîye Bakay wina qal kerd: “Kes bi zerrîya xo nêwazeno tîya bimano. Hîn TOKÎ nêameyê teslîmkerdiş. Erdlerzî de keye û kargehê mi rijîya. Semedê nê prosesî psîkolojiya ma serûbin bî. Xeylêk cîranê mi dinyaya xo bedelnayî. Wexto ke kar çin bî, hîn problemî vejîyayî vernî. Badê erdlerzî ma nêeşka xo xelas bikerê. Ma tu paştdayîş dewlete ra nêgirewt. Konteynirê ke welatê bînan ra yenê, hema zî eşkenê bêrê girewtiş. La dewlete tu paştdayîş nêda ma. Tu sozî nêameyî bicaardiş.”

 

‘Hetkarî teber ra ameye'

 

Bedrîye Bakay dewam de wina vat: “Kesê ke banê înan bi vurnayîşî ameyê viraştiş, hema zî pere nêameyo dayîş. Pêro hetkarî semedê Bazarcixî teber ra ameyîne. Çîyêk hetê dewlete ra nêame dayîş. Wexro ke konteynir ame dayîş, tenê 2 sindoqê werdî hetê Kizilay ra ameyî dayîş. Pakete de deterjan û sabûn est bî. Xêrcê nê reyke zî şîranîya roşanî û kolonya dayî ma.”

 

 

'Vernîya ke ez keye de bimanî pêro hetkarî birnayî'

 

Gulê Eyig zî wina qalî kerd: “Hetkarî mi rê nêameye. Semedê girewtişê erzaqî qert dayî ma la badê ma ra girewtî. Ma ra vatî ke TOKÎ est ê, înan kart girewtê. Mi hema keye nêdîyo, vernîya ke ez keye bigîrî pêro hetkarî birnayî. Wexto ke ma şî TOKÎ, çîyê ke dabî zî ma ra girewtî. Pêro çîyê mi binê xirbeyan de mendî. Nika eke ez derbazê TOKÎ bibî ez o se bikerî?"

 

'Deyn problemêk cîya yo'

 

Gulê Eyig,dîyar kerd erdlerzî ra timî derman şuxilnena û wina vat, “Semedê erdlerzî ma zehmetîyan ancenê û semedo ke keyeyê ma hema zî nêameyê dayîş. Ma bi keda xo hewl danê xo zimistanî rê amade bikerê. Belê, qeza de hewa lêşîn a, ganî ma fêkîyan wuşk nêkerê. La ez mecbûr a, eke ez fêkîyan wuşk nêkerî, ma do zimistanî vêşan bimanê.”