Neslîhan Kardaş-Memîhan Zeydan 

 

WAN - Cinîyan derheqê tayînkerdişê qeyûman de ercnayîş kerdî û dîyar kerdî ke qeyûmî bêhuqûqî yê.

 

Weçînayîşê herêmî yê 31ê adare de Partîya Têduştî û Demokrasî (DEM Partî) bi dayeyêk pîl ê rayan Şaredarîya Bajarê Pîlî û 14 şaredarîyê qezayan pêrûne bidest kerd. Ewil qeyûm tayînê şaredarîya Mîksî ame kerdiş û badê 11ê sibate de hetê 5ine Dadgeha Cezaya Giran ya Amedî ra hemşaredarê Bajarê Pîlî yê Wanî Abdullah Zeydanî rê 3 serrî û 9 aşmî ceza ameye birnayîş. Badê nê şarî verê awanîya şaredarî de nobete dayî destpêkerdiş. 15ê sibate de qeyûm tayînê şardarî ame kerdiş. Reaksîyonê hemverê qeyûman dewam kenê.

 

Cinîyan derheqê tayînkerdişê qeyûman de ercnayîş kerd û dîyar kerdî ke tayînkerdişê qeyûman nêheqîyêk hemverê şarî yo.

 

Zekîye: "Ma semedê çarserîyêk baş dua kenê. Ganî wina nêbîne. Ma azadî wazenê.”

 

Dîlan Hacan: “Qeyûmî zulm ê, esîrgirewtiş ê. Ma pêro esîr ê û çi yeno sereyê ma nê ra yeno. Ma hemverê qeyûman de heqê xo wazenê. Ma çîyêk bîn nêwazenê. Nika rewşa ke ma ciwîyenê oyo ke bi zor heqê ma yeno xespkerdiş.”

 

Nurcan Utuş: “Qeyûm heqerat ê. Çira nê heqaretî ma rê yenê kerdiş? Êdî bes o. Ma her weçînayîşî de şinê sindoqan ser û la veng o. Aştî weş a. Kam aştîye nêwazeno? Ma pêro dayîkê kurd ê û aştîye wazenê.”

 

Behîce Utuş: “Ez aştîye wazena. Çira nê bêhuqûqî yenê kerdiş. Çîyo ke ma ciwîyenê zulm o. Ma televîzyonan de vînenê, polîsî ezîyet cinîyan rê kenê. Wa Homa qebûl nêkero.”

 

Mayîse Yalçin: “Wa her di hetî pê bikerê. Ma aştîye wazenê. Ma çîyêk bîn nêwazenê. Ma qeyûman nêwazenê aştî wazenê. Wa homa nê zulmî qebûl mekero.”

 

Hahriye Kipçak: “Ma her tim şinê sindoqan ser. Yê ke rayanê qîmî gênê wa bibê hemşaredar. La no hukmat ne rayan û ne zî qanûnan nas keno. Ma zî qebûl nêkenê.”