MERKEZÊ XEBERAN - TJAyî eşkerayîya xo ya derheqê destbendkerdiş û tepiştişê hemverê HDKyî de vat, “Ma dorê HDKyî de xo bi rêxistin bikerê. Ma do sereyê xo hemverê zulm û kerdişê bêhuqûqî nêtewênê. 

 

Têgêrayîşê Cinîyanê Azadan (TJA) bi eşkerayîyêke nuşteyî reaksîyon vera destbendkerdişê 30 kesê ke xeylê înan endamê Kongreya Demokratîke ya Şaran (HDK) bî û sereştişê 18ê Sibate de rojnamegerî zî mîyan de ameyî destbendkerdişê, mojnayî. 

 

'HDK hêzê îlhamî yê cuya newe yo'

 

Eşkerayîye de ame dîyarkerdoş ke AKP bi zext, destbendkerdiş û tepiştişan hewl dano mûxalefetê komelî bi taybetî cinîyan semedê misogerîyê îqtîdarê xo asteng bikero û wina vat: "Têkoşînê hempar ê şarî û cinîyan, cewabo tewr pîl ê îqtîdarî yo ke bi polîtîkayê şerî, qezenc û talankerdişî, qirkerdişê cinîyan, qirkerdişê ekolojîk dir hewl dano komelî biçewisno. Çarçewaya nê polîtîkayê çewisnayîşî de hemverê Kongreya Demokratîke ya Şaran (HDK) operasyonê qirkerdişê sîyasî ameyî organîzekerdiş û xeylêk hemrayê ma, rojnamegerî, nuştoxî, hunermend û sosyalîstî bi hawayêk bêhuqûqî ameyî tepiştiş. HDK xeta hîrên û rayîrê hempar ê şaran û cinîyan o. Wareyê tewr demokratîk ê têkoşînî ke pêro bawerî, nasnameyî zo binê banê ci de birêxistin kenê.

 

Ma do xo bi rêxistin bikerê

 

Ne hevalê ma û ne zî ma, ma do hemverê şima de sere nêtewênê! Ma reyke bîn venga nê hukmato ke nêeşkeno welat rayîr ra bero û şarî anceno mîyanê çiravî, vanê: Ganî fek nê bêhuqûqîyî vera bidê û hevalanê ma vera bidê! Ma do sere hemverê şima nêtewênê, ma do semedê cuyêka têduşt û adil her wareyê cuye de xo bi rêxistin bikerê.