AMED - Qelema cinî ra kitabê Stranên Dawetan ke deyîrê; veyveyan, zama û veyvanê Farqîn, Pasûr û Êlihî ser o, bi arêdayîş û amadekerdişê Bêrîvan Matyare, weşanxaneyê Weqfa Mezopotamya ra vejîya.

 

Kitabo ke demêk o Bêrîvan Matyar ser o eleqedar bîne û xebityayîne, fekê xeylêk cinîyê herêma Farqîn, Pasûr û Êlihî deyîrê veyve, zama û govendan ser o arêdabî, bi nameyê Stranên Dawetan sey kitab mîyanê weşanê Weqfa Mezopotamya de ame çapkerdiş.

 

Vejîyayîşê kitabî dir Bêrîvan Matyar hîsê xo wina ard ziwan: “Ewro semedê mi rojêke tarîxî ya. Kitabê Stranên Dawetan, projeyêko pîl bi ke mi barê ci da milê xo ser û ewro zî berardişêk wina netîce bî. Şanaz a. Keyfan ra kena biperî. Keda xeylêk merdimê delalî nê berardişî de est a; Zeynep Yaş, Şenay Kumuz, Ihsan Zanyar, Serdar Canan, Argun Çakir, Eşref Keydanî, Mikaîl Bilbil, Mustafa Aydogan, Behruz Sucai, Îhsan Ay û Selîm Gokçe… Ez o badê yew bi yew qalê înan, raywanîya xo û nê berardişî bikerî. La wazena ke vajî; ez minetdar a dayîka xo Wetha Matyar a û xalanê ci ya. Sewbîna minetdara waya xo Şehrîban Matyar a. Înan mi ra bawer kerd û paştdayîş dayî mi. Keda înan bêhempa ya…”

 

Badê ke Bêrîvan Matyar hîsê xo ardî ziwan, dîyar kerd ke do demê bêro de agahîyê berardişî û tomarkerdişê deyîrê veyveyan, zama û govende bi çi hawayî pê ameyê, demê bêro de dîyar bikero.