Gulistan Gulmuş

 

AMED - Narîn Gezgor da zanayîş ke DBP’yî do bi sloganê ‘ma bi cinîya azade komelê demokratîkî awan kenê’ aşma gulane ra tepîya dest bi xebatanê rêxistibîyayîşî bikerê û da zanayîş ke hemverê polîtîkayê şerê taybetî do pêro wareyan de xebatê rêxistibîyayîşî bikerê.

 

Partîya Herêmanê Demokratîke (DBP) Amed de 13ê Nîsane de netîcenameyê kombîyayîşê Meclîsê Partîye (PM) eşkera kerd. Netîcename de qerarê sey do ‘vengdayîşê aştî û komelê demokratîkî’ yê Rayberê Şarê Kurdî Abdullah Ocalanî bêro qalkerdiş û çarçewaya seferberîya rêxistinbîyayîşî de serdayîşê keyeyan û kombîyayîşê şarî bêrê kerdiş. Xebatê DBP’yî yê rêxistinbîyayîşî do aşma gulane de  dest pêbikerê.

 

Verfeka komîsyonê rêxistine ya DBP’yî Narîn Gezgor derheqê babete de qisey kerd.

 

‘Ma do berpirsyarîyê xo bica bîyarê’

 

Narîn Gezgor bale ant serê vengdayîşê ‘aştî û komelê demokratîkî’ yê Rayberê Şarê Kurdî Abdullah Ocalanî û va: “Badê vengdayîşî ma pêvînayîş cinîyan dir û şarî dir kerd. Persê ‘Ocalanî wezîfeyê xo bica ard û tîya ra tepîya do se bibo?’ Vejîya werte. Ma 101 kombîyayîşî viraştî. Vengdayîşo ke Abdullah Ocalanî kerd, vengdayîşêk zaf pîl bî. Helwesto ke vejîya werte; ma kîşte îradeyê ke Ocalan dayo werte de yê, ma do dore de binê yew. Şar, ciwanî hetê awankerdişê aştî û komelê demokratîkî de îradeyêk hempar dayî werte."

 

‘Mesajê ke rol û mîsyonê cinîyan dayo werte’

 

Narîn Gezgor dewam de wina va: “Abdullah Ocalan babeta azadîya cinî de her tim fikr û ewnîyayîşê kûrî vet werte. Birêz Ocalan vano, ‘cinî azad nêbê, komel zî azad nêbeno’. Ma sey meclîsê partîya sey MYK’yî kombîyayîşê xo kerd. Semedo ke ma cewab bidê vengdayîş, kombîyayîşanê xo de ma qerar girewt. Me kombîyayîşê meclîsê cinîyan pê ard. Ma hetê cîya dir munaqeşe kerd. Çarçewaya îdeolojîya xelasîya cinî de ma atolyeyê neweyî plan kerdî. Ma do demê bêro de xebatê neweyî; taxan, dewan de  bidê destpêkerdiş.”

 

Xebatê rêxistinbîyayîşî

 

Narîn Gezgor dewam de wina va: “Ma do xebatanê xo dewam bikerê. Ma do vengdayîşê komelî bikerê. Ma pêro Tirkîya û Kurdistanî de serdayîşê keyeyan da destpêkerdiş. Ma do dima ra taxan de kombîyayîş bikerê. Ma do muhîmî bidê rêxistinbîyayîşê komelî. Ma venga pêro cinîyan danê. Bêrê ma xeta têkoşînî de bêrê têhet û xeta têkoşînî pîya xurt bikerê. Ma do hemverê polîtîkayê şerê taybetî pêro wareyan de xebatanê rêxistibîyayîşî bikerê.”