STENBOL - 46 rêxistinê huqûq û heqê merdiman û sazgehê sivîlî semedê “heqê hevîye” yê tepişteyan pê bêro, eşkerayîyêka hempar dayî û eşkerayîye de wina ame vatiş: “Bingehê heqê hêvîye, wareyê aştîya komelî û heqê merdiman de lazimîyêk acîl o.”

 

Bi serkêşîya Weqfê Cigêrayîşê Komelî û Huqûqî (TOHAV) rêxistinê komelî yê sivîlî û xeylêk baroyê bajarê Bakurê Kurdistanî mîyan de 46 sazgehî derheqê “heqê hevîye” yê Rayberê Şarê Kurdî Abdullah Ocalanî de eşkerayî dayî. Eşkerayî Weqfê TOHAV’î yê qezaya Beyoglû ya Stenbolî de amî dayîş. Hemsereka Pêroyî ya Komeleya Heqê Merdiman (ÎHD) Eren Keskîn û îdarekarê TOHAVî û temsîlkarê sazgehan tewrê eşkerayî bîyî. Destpêk de Eren Keskîne qisey kerd û va: “Badê muhakemekerdişê birêz Abdullah Ocalanî, cezaya îdamî rawuşt. Ewro zî heqê hêvîye yeno munaqeşekerdiş. Heqê hevîye xelatêke nîyo, ganî pê bêro. Qanûnê mîyanneteweyî de ameyî dîyarkerdiş. Pêro dewletan îmza kerdê zî ganî nê heqî ca bîyarê.”

 

‘DMME’yî heqê hêvîye sey heqêq bingehîn qebûl kerdo’

 

Metnê eşkerayîya hempar hetê Hemsereka TOHAVî avûkate Destîna Yildiz ra amî wendiş. Destîna Yildiz wina va: “Tirkîya de tepişteyê ke hikum werdê hevîya înan ê veradayîşî yena binpaykerdiş û hemverê huqûqê heqê merdiman cezayêke bêdem yena dayîş. Taybetî tepişteyê ke çerçewaya ‘Sûcê hemverê asayîşê dewlete’ de bi muebetê giran ameyê cezakerdiş, nê heqî ra bêpar manenê. Cezaya girankerde yê heta hetayî ke heta merdişî bê îmkanê serbestveradayîşê bi şertî yeno dayîş, şibîyenê cezaya dardekerdişî. Nê cezayî heqê bîyayîşê qanûnê ferdî rê padano û îhtîmalê agêrayîşî yê komelî bi temamî werte ra wedarneno.”

 

Nameyê hîn sazgehê ke metnê hempar îmza kerdê nê yê:

 

Baroyê Kurdistanî, Weqfê Cigêrayîşê Komel û Huqûqî, Weqfê Heqê Merdiman ê Tirkîya, Komeleya Heqê Merdiman, Komeleya Huqûqnasê Azadî, Weqfê Aştîye, Kolektîfê Cigêrayîşî yê DEMOS, Komeleya Taqîbkerdişê Heqê Têduştî, Komeleya Taqîbkerdişê Koçberî, Înîsiyatîfê Heq, Heqîqet, Înîsiyatîfê Edaletî, Komeleya Edebîyatê Hunerî yê Kulturê Cinî, Komeleya Heqê Cinîyan ê Wextî, Komelaya Dadsazgeh, Humanet Koma Huqûqnasê Demokrat, Komeleya Cinîyan ya Rosa, Komeleya Cinîyan a Star, Weqfê Heqê Merdiman Tahîr Elçî, Têgêrayîşê Cinîyanê Azadan, Komeleya Azadîya Vîrê Cuye û Odaya Tabîban.