Elfazî Toral

 

STENBOL - Derya Gorala DEM partîyije wina va: “Ganî komîsyon semedê prosesî erey nêmano. No serdem meşgûlkerdişî efû nêkeno. Ganî Abdullah Ocalan û tepişteyê sîyasî lezgîn bêrê tahlîye kerdene.”

 

Dimayê vengdayîşê Rayberê Şarê Kurdî Abdullah Ocalanî yê 27ê Sibate kerd, proses newe ra dest pêkerd. Girêdayê prosesî averşîyayîşê girdî qewimîyî. Meclîs de komîsyonêk ame awankerdiş. Çarçeweya prosesî de Meclîs de Komîsyonê Piştîdayîşê Mîllî, Wayê-Bira Demokrasî ame awankerdiş û komîsyon dimayê qerarê girewtişî şi Îmrali û Rayberê Şarê Kurdî Abdullah Ocalanî dir pêvînayîş kerd. Dimayê pêvînayîşî serekê meclîsî ard ziwan ke nê gamî wareyê prosesî de pozîtîf ê û derheqê muhtewayê pêvînayîşî de tu çî nêva. Yeno pawitiş ke komîsyon rojê bêrê de xebatê raporî bidomno.

 

Verfeka Herêma Dîyine ya Partîya DEMî Derya Goral derheqê komîsyon û pêvînayîşê Îmraliyî de qisey kerd.

 

‘Ganî ma demokrasî bîyarê meydan’

 

Derya Goral ard ziwan ke serrêke verî proses 1ê temmuze de dest pêkerdbî û dimayê ke serekê pêroyî yê MHP Devlet Bahçelî silam da parlamenteranê DEM Partî proses newe ra dest pêkerd. Derya Goral eşkera kerd ke serrêkê de averşîyayîşê ke ameyî pawitiş nêqewimîyayî û va: “Çîyê ke ma pawitî gelo qewimîyayî? Nê, wina nêbî. Warê pratîkî de sererastkerdişê qanûnî nêbî. Hedefê ma no bi ke demokrasîyêko ke xizmetê şaran keno bêro awankerdiş. Ma serrêke verî ewil nê eşkera kerd. Ma nê şarî rê, komelî rê qal kerd. Armancê ma no yo ke demokrasî bêro awankerdiş.”

 

‘Armancê ma awankerdişê demokrasî yo’

 

Derya Goral dîyar kerd ke armancê înan awankerdişê demokrasî yo û va: “Sere de îqtîdar ganî heme kesî mesûlîyet bigîrê xo ser. Awankerdişê zordarîyê komelî awan kerdo wezîfeyê ma yo. Şîyayîşê komîsyonî yê Îmraliyî zî erey mend. Rewşa winasî de ganî hende erey nêmanê. Ma tîya ra ewnîyenê, demo ke ma problemê derheqê prosesî de analîz kenê, rewşe hîna cîya ya. Ganî hîna lez bikerê. Abdullah Ocalan wazeno proseso ke cewabê komelan bido aver şoro. Prosesê aştîye tenya şarê kurdî eleqedar nêkeno. Heme şaran hewêneno. Birêz Ocalan prosesê aştîye hedef keno. Zano ke ameyox de tehdîdêko gird vernîya na cografya de est o.”

 

‘Ganî lezgîn bêrê tehlîyekerdiş’

 

Derya Goral dewam de dîyar kerd ke ganî hem Rayberê Şarê Kurdî Abdullah Ocalan hem zî tepişteyê sîyasî lezgîn bêrê veradayîş û va: “Ganî tepişteyî zîndan ra vejîyê, no yeno a mana ke welat roşn bibo. Ganî sererastkerdişê qanûnî bêrê kerdene. Tepişteyî bi ‘terorî’ yenê îthamkerdene. Tepişteyê ma semedê cuyêka merdimayî xizmet kenê. Ganî lezgîn zîndanî bêrê vengkerdene. Ganî şert û mercê mîmarê prosesî, aktorê sereke yê prosesî Abdullah Ocalanî bêrê başkerdene. Abdullah Ocalan serekê şarî yo.”

 

‘Ganî komîsyon ziwanêko zelal bişuxulno’

 

Derya Goral qiseykerdişê xo wina peynî kerd: “Ganî komîsyon ziwanêko zelal bişuxulno. Ganî pratîk de zelal bo. Wa meşgûl nêkerê. No serdem nê efû nêkeno. Nê problemî tenya şarê kurdî eleqedar nêkenê. Heme şaran eleqedar kenê. Ma wazenê bi hawayêko azad sîyaset bikerê, xo îfade bikerê. Ganî ma demokrasî ke rayîr azadîye akeno awan bikerê. Şar nê çî komîsyonî ra wazeno. Na rewşe ferz a. Ganî hîsgêrî têbigêrê. Ganî ziwanêko zelal bişuxulnê, bi hawayêko zelal bikerê pratîk.”