Buşra Turan

 

AGIRÎ - Dîyar bî ke Goncagul Arslana 26 serrî ya ke binê şertê bigumanî de merda, 16 serrîya xo ra binê zordarîya şîdetê sîstematîkî û zewacê bi zorî de ciwîyaya. Çimeyêk xeberan ke qalê cuya Goncagul Arslan kerd va: “Înan aye mîyanê xo de sey qurbanî weçînabî; bi vatişê ‘to do şêrî dibistane’ aye xapênayî û stargeh ra ardî keyeyo ke ci de şîdet ameyîne kerdiş.”

 

Tirkîya de, merdişê bigumanî yê cinîyan benê krîzêk ke semedê nêbîyayîşê pawitişî semedê cinîyanê ke bi rayîrê “îqnakerdişî” mecbur manenê stargeh ra agêrê û polîtîkayê bêcezaverdayîşî semedê sucdaranê giranêr beno. Goreyê dayeyê bîyayeyê rêxistinê cinîyan, çaryewê verêna 2026ine de, dayeyêk pîl hedîseyê ke sey merdişê bigumanî ameyî tomarkerdiş eşkera kerd ke cinîyê ke verê semedê şîdetî pawitişê fermî waştibî la pawitişêk bes semedê înan nêameybî peyda kerdiş. Nêbîyayîşê tespîtkerdişê sucdaranê bêasayîşê komelî kûrêr keno.

 

Hedîseya 19ê nîsana 2026ine de, taxê Fatihî ya qezaya Diyadînî ya Agirî ke bî sebebê merdişê biguman ê Goncagul Arslana 26 serrî ya, ancî tehlukeyê sîstematîkî yê cuya cinîyanê herême yê ke emrêk ciwanî de yenê zewicnayîş û semedê zordarîya keyeyî mecbur manenê stargeh ra bivejê, ard vernî.

 

Dimayê merdişê bigumanî, çimeyêk ke semedê sebebanê asayîşî nêwaşt nameyê xo eşkera bikero, derûdorê zordarî yê dorê cuya Goncagul Arslane qal kerd.

 

‘Aye sey qurban ameye weçînitiş’

 

Çimeyêk xeberanê ke nêwaşt nameyê xo eşkera bikero, dîyar kerd ke Goncagul Arslan demî dir vurîyayîşêk muhîm vîyarna û wina eşkera kerd: “Goncagul merdimêka zaf gane bî. Jîyatî bî; her wexto ke ez aye dir bîne ez huyayîne. Merdimêka zaf baş bî. Wayîrê karakterêk baş bî. Demê peyêne de, aye tutan pê dima ard dinya, la bi zerrî nê; ê netîceyê tecawizî bîyî, yanî no bi zorî bî. Hetê mêrdeyê aye yê keyeyî - xesûya aye, xezûrê û mêrdeyê aye nêverdayîne ke aye bivejo teber. Aye tena tutan û heywanan dir meşgul bîyîne. Cuya aye ya komelî çinbî. Bi rastî, hetê mêrdeyê aye waştêne ke cuya aye ya komelî çinbo. Heta roja daweta xo de zî, waya aye hewl dayîne ke aye mecbur bikero bihuyo. Aye waştişê xo yê veradayîşî zî ard ziwan. Dimayê pêrodayîşêk, aye nêzdîyê panc reyan ameye keyeyê babîyê xo. Aye va ‘keremê xo ra, mi ey kesî ra cîya bikerê’ la her rey ke aye dimayê pêrodayîşêk ameye, babîyê aye şan de Goncagule berdêne keye. Aye her wext hewl dayîne ke nê çî şarê dorê xo rê eşkera bikero, la înan Goncagule sey qurbanêk mîyanê xo de weçînabî.”

 

‘Emrêk qijî de ameye zewicnayîş’

 

Çimeyî qisey kerd û va ke Goncagul Arslan emrêk qijî de bi zorî ameya zewicnayîş û va: “Zewacê Goncagule xora zewacêk zaf ecêb bî. Bi taybetî bedenê aye rotî kesêk rê. Goncagul 16 serrîya xo de ameye zewicnayîş. Înan Goncagule bi S.Ayî dir zewicnayî. Zewacêk bî ke aye qet nêwaşt; aye no zaf reyan hevalanê xo yê dibistane û mi ra vatêne. Verê ke şêro stargeh, Goncagul Arslan babîyê xo rê va ‘Ez nêwazena binîşan bibî’. Birayê aye yê girdî F.A. va ‘Ez wurzî û sereyê to tira bikerî.’ Dimayê nê, Goncagul Arslan hewl da xo bikişo. Berdî nêweşxane. Bi rastî, hewldayîşê xokiştişê verêne yê Goncagule demê nîşanî de bî. Şima eşkenê nê tomarê nêweşxaneyê dewlete de bivînê. Dimayê nê, Goncagul Arslan semedo ke aye S.A. nêwaşt, şî stargehêk. Dimayê nê, o demî de zordarî aye ser o ame kerdiş.”

 

‘Bi zorî zewacê berdêlî kerdî’

 

Çime, bale ant meseleya ke Goncagul Arslan senîn stargeh ra ameya keye ke uca de şîdet ameyo kerdiş û dîyar kerd ke zordarîya keyeyî nê prosesî de dewam kerd û va: “Keyeyî aye şi stargeh ta ke Goncagule îqna bikerê. Înan aye îqna kerdî û ardî keye. Înan soz dabî Goncagule do agêro dibistane. La înan Goncagule berd keyeyê S.Ayî. Wexto ke aye stargeh de bî, semedê Goncagule meclîsêk keyeyî ame organîzekerdiş. Goncagule lajê xale xo dir ameye zewicnayîş û zewaco berdêl pê ame.”

 

‘Roja xokiştişê xo de şîdet dî’

 

Çimeyî qalê merdişê biguman ê Goncagule kerd, zordarîya ke aye rî bi rî menda qal kerd û wina dewam kerd: “Qedexe bî ke bi hevalanê xo yê tewr nêzdî dir qisey bikero. Qedexe bî ke heme pismamanê xo dir qisey bikero. Goncagule cuyêk zîndanî ciwîyayîne. Zewacê berdêl aye hetê psîkolojîkî ra zaf rincan kerdebî. Dimayê hedîse, keye telefon kerd û tehdîdê temamîyê keyeyê hîrayî kerd. Vatî ‘Eke kesêk qisey bikero, ma do înan bikişê.’ Roja hedîse de, S.Ayî dir munaqeşeyêk pîl pê ame. Goncagul Arslan keyeyê xo ra telefon kerd û va ‘Ez nêeşkena îdare bikerî.’ Keyeyê aye va ‘Hetê ma de veradayîş çin o; eke ti eşkena, xo daliqne, xo xilas bike û ma zî xilas bike.’ Goncagule semedo ke depresyono giranî de bî, xo kişt. Bi rastî, şîdet estbî, la semedo ke qedexe bî ke ma Goncagule dir qisey bikerê, aye nêeşka bi detay na mesela mi rê qal bikero. A roje, S.A. zaf xerab Goncagule derb kerdebi. Goncagule şîbî keyeyê babîyê xo la babîyê aye aye peyser şirawit.”